काठमाडौँ । ग्लोबल आइएमई बैंकको नाफा बढेको छ । बैंकले प्रकाशित गरेको गत आर्थिक वर्षको चौथो त्रैमाससम्मको अपरिस्कृत वित्तीय विवरण अनुसार बैंकको खुद नाफा २२.६७ प्रतिशतले बढेको हो । यस अवधिमा बैंकले कुल ६ अर्ब २२ करोड ७१ लाख रुपैयाँ खुद नाफा कमाएको छ । जबकी बैंकले अघिल्लो आर्थिक वर्षको सोही अवधिमा ५ खर्ब ७ करोड ६३ लाख रुपैयाँ खुद नाफा कमाएको थियो । 

समीक्षा अवधिमा बैंकको खुद ब्याज आम्दानी १६ अर्ब २० करोड ३० लाख रुपैयाँ कायम भएको छ  । 

यता बैंकको खराब कर्जा १.२२ प्रतिशतबाट घटेर ०.५९ प्रतिशतमा झरेको छ । यही कारण बैंकको इम्पेयरमेन्ट चार्ज पनि २०.२४ प्रतिशतले घटेर ५ अर्ब ९७ करोड ८५ लाख रुपैयाँबाट ४ अर्ब ७८ करोड ८३ लाख रुपैयाँमा झरेको छ । यही कारण पनि गत आर्थिक वर्षको अन्त्यसम्ममा बैंकको नाफा बढेको हो ।

त्यस्तै, समीक्षा अवधिमा बैंकको सञ्चालन नाफा पनि २०.०३ प्रतिशतले बढेर ८ अर्ब ६८ करोड २१ लाख रुपैयाँ पुगेको छ । बैंकको वितरणयोग्य मुनाफा ४ अर्ब ५८ करोड १० लाख रुपैयाँ छ भने बैंकको प्रतिसेयर वितरणयोग्य नाफा १२ रुपैयाँ २ पैसा छ । 

नाफासँगै समीक्षा अवधिमा बैंकको प्रतिसेयर आम्दानी (इपिएस) पनि बढेको छ । यस अवधिमा बैंकको इपिएस ३ रुपैयाँ ०२ पैसाले बढेर १३ रुपैयाँ ३२ पैसाबाट १६ रुपैयाँ ३४ पैसा पुगेको छ । बैंकको प्रतिसेयर नेटवर्थ १८३ रुपैयाँ १४ पैसा छ । कुल चुक्ता पूँजी ३६ अर्ब ११ करोड ५८ लाख रुपैयाँ कायम रहेको बैंकले गत आर्थिक वर्षको अन्त्यसम्म ६ खर्ब ६९ अर्ब १७ करोड रुपैयाँ निक्षेप संकलन गरेको छ भने ४ खर्ब ३९ अर्ब ३४ करोड रुपैयाँ कर्जा प्रवाह गरेको छ ।