काठमाडौँ । पेट्रोलियम पदार्थ बोकेको ट्यांकरबाट तेल चोरेर बेच्ने ७ जना पक्राउ परेका छन् । पर्साको वीरगञ्ज महानगरपालिका-१४ स्थित बाइपास सडकखण्डमा ट्यांकरबाट अनधिकृत रुपमा तेल चोरी गरेर बेच्ने ७ जनालाई प्रहरीले पक्राउ गरेको हो । 

पक्राउ पर्नेमा आयल सेन्टरका सञ्चालक ५५ वर्षीय सुनैन मियाँ, लेखा शाखामा कार्यरत २३ वर्षीय असलम हवारी, क्यासियर २१ वर्षीय रफिक मियाँ, ना.७ ख २८०४ नम्बरको ट्याङ्करका चालक ४६ वर्षीय केशर राम सुनार र सहचालक २० वर्षीय सन्देश राना मगर, तथा ना.७ ख १५३९ नम्बरको ट्याङ्करका चालक ५० वर्षीय मन्द सिंह लामा र सहचालक २७ वर्षीय उमेश राना मगर रहेका छन् ।

उनीहरुलाई वीरगञ्ज-१४ स्थित सौदागर आयल सेन्टरबाट ना ७ ख १५३९ नम्बरको ट्यांकरबाट फलामको पाइपको हुक प्रयोग गरी सिल उचालेर तेल चोरी गरिरहेको अवस्थामा पक्राउ गरिएको प्रहरीले जनाएको छ । 

हाल ट्यांकरबाट पेट्रोलियम पदार्थ चोरी गरेको आरोपमा पक्राउ परेका ७ जनाविरुद्ध थप अनुसन्धान भइरहेको प्रहरीले जनाएको छ । प्रहरीले घटनामा संलग्न ट्यांकरसमेत नियन्त्रणमा लिएको छ ।