काठमाडौँ । थुनामा रहेका व्यक्तिलाई धरौटीमा छुटाइदिने भन्दै साढे ४ लाख बढी असुली गर्ने पक्राउ परेका छन् । लागूऔषध मुद्दाका प्रतिवादीलाई धरौटीमा छुटाइदिने भन्दै ४ लाख ७९ हजार रुपैयाँ असुली गर्ने दुई जनालाई प्रहरीले पक्राउ गरेको हो । 

पक्राउ पर्नेमा काठमाडौँको तारकेश्वर नगरपालिका-८ का ४२ वर्षीय हरिराम गिरी र नुवाकोट घर भई हाल तारकेश्वर-८ बस्दै आएका ३१ वर्षीय अजय थापा मगर छन् । 

उनीहरुले लागूऔषध मुद्दाका एक प्रतिवादीलाई धरौटीमा छुटाइदिने भन्दै ती प्रतिवादीकी श्रीमतीबाट ४ लाख ७९ हजार रुपैयाँ असुली गरेका थिए । 

सो सूचना पाएपछि प्रहरी वृत्त सिंहदरबारबाट खटिएको टोलीले उनीहरुलाई काठमाडौँ जिल्ला अदालत परिसरबाट पक्राउ गरेको प्रहरीले जनाएको छ । पक्राउ परेकाहरुको साथबाट प्रहरीले ४ लाख ७९ हजार रुपैयाँ, तीन थान मोबाइल र प्रतिवादीकी श्रीमतीको नाममा रहेको माछापुच्छ्रे बैंकको ७ थान खाली चेक बरामद गरेको छ ।