काठमाडौं – मञ्जुश्री फाइनान्सले सोमबारदेखि सेयर लिलामीमा ल्याएको छ । मञ्जुश्रीले संस्थापक समूहको १६ हजार ५६३.९ कित्ता र सर्वसाधारण समूहको २२ हजार ५४८.१ कित्ता गरि जम्मा ३९ हजार १२२ कित्ता सेयर लिलामी प्रक्रियाबाट बिक्री खुला गरेको हो । यसमा न्यूनतम १०० रुपैयाँलाई आधार मानेर प्रतिस्पर्धात्मक बोलकबोलमा सहभागी हुनुपर्नेछ ।

आवेदन दिने अन्तिम म्याद जेठ २१ गतेसम्म हुनेछ । आइतबार नेप्सेमा मञ्जुश्रीको प्रतिकित्ता १२४ रुपैयाँमा भाउ क्लोजिङ भएको छ । लगानीकर्ताले लिलामी भर्दा दोस्रो बजारमा कायम भाउलाई पनि ख्याल गर्नुपर्ने हुन्छ । सोही आधारमा लिलामीमा कति रुपैयाँसम्म मूल्य प्रस्ताव गर्ने भनेर निर्णय लिन सजिलो हुनेछ । 

बिक्री प्रबन्धक एनआइबीएल एस क्यापिटल लिमिटेड लाजिम्पाट काठमाडौं र लालदरबार काठमाडौं, ललितपुर, पोखरा, बुटवल, वीरगञ्ज शाखा कार्यालयहरुबाट सेयर भर्न पाइनेछ । यसैगरी, मञ्जुश्री फाइनान्सको नयाँ बानेश्वर काठमाडौं कार्यालयबाट पनि बोलपत्र भर्न मिल्नेछ । नेपाल इन्भेष्टमेन्ट बैंकको सुर्खेत, नेपालगञ्ज, नारायणगढ र धनगढी शाखा कार्यालयबाट पनि लिलामी भर्न सकिनेछ । हाल मञ्जुश्रीको चुक्त पुँजी ७२ करोड ४३ लाख ७९ हजार रुपैयाँ रहेको छ । लिलामी बिक्री गरिसकेपछि चुक्ता पुँजी ७६ करोड ५ लाख ९८ हजार रुपैयाँ पुग्नेछ ।