काठमाडौँ-निर्वाचनको समयमा बुढा मान्छेले भोट हालेको कुरा चर्चामा आउने गरेको छ । यस्तै प्रतिनिधि तथा प्रदेशसभा सदस्यको निर्वाचनमा नुवाकोटको ककनी गाउँपालिका–८ का ११५ वर्षीया बाटुली लामिछानेले मतदान गरेको खबरले पनि यतिबेला चर्चा पाएको छ । उनले ककनी गाँउपालिका–८ मात्रागाउँमा रहेको अरुणोदय आधारभूत विद्यालय मतदान केन्द्रबाट आइतबार मतदान गरेकी हुन् ।
विसं १९५९ साल चैत १० गते जन्मेकी लामिछानेले छोराको सहयोगमा मतदान गर्न पाएकोमा निकै खुसी समेत व्यक्त गरिन् । साथै उनले आफुलाई पाल्ने पार्टीलाई भोट हालेको समेत बताइन् । भोट हालियो होइन त आमा ? भन्ने प्रश्नमा उनले मुस्कुराउँदै भनिन्, ‘हो त ! हामीलाई पाल्ने वृद्धभत्ता दिनेलाई झ्याप्पै भोट हालियो नि ‘
यता सूर्यगढी गाउँपलिका–३ का १०१ वर्षका अनन्तप्रसाद अधिकारीले पनि आइतवार भोट हालेका छन् । उनले भने नाती समुन्द्रबाबुको सहयोगमा बागेश्वरी मावि मतदान केन्द्रबाट अधिकारीले मतदान गरेका हुन् ।
