काठमाडौं – बुधवार नेप्से परिसूचक १ दशमलव ६५ प्रतिशत घटेको छ । १ घण्टा नवित्दै १ हजार ४ सय २ विन्दुमा झरेर पुनः सुधारिने प्रयासमा रहेको परिसूचक पुनः ओरालो लागेको छ । २ घण्टाको व्यापारमा परिसूचक २३ दशमलव ६८ अङ्क घटेर १ हजार ४ सय ९ दशमलव ३१ विन्दुमा पुगेको छ । 

उत्पादन तथा प्रशोधन समूह बाहेक कारोबारमा आएका सबै समूहको परिसूचक घटेपछि नेप्से परिसूचक ओरालो लागेको हो । यस समयमा १ सय १० कम्पनीको १ हजार ७ सय ७६ पटकको व्यापारमा रू। २८ करोड ४० लाख बराबरको रकम कारोबार भएको छ ।

उत्पादन तथा प्रशोधन समूहको परिसूचक शून्य दशमलव ५९ प्रतिशतले बढेको छ । त्यस्तै, बैङ्किङ समूहको परिसुचक २ दशमलव शून्य ७ प्रतिशत, बीमाको २ दशमलव शहून्य ३ प्रतिशत, वित्त कम्पनीको १ दशमलव ३९ प्रतिशत र जलविद्युतको १ दशमलव २१ प्रतिशत घटेको छ । साथै, विकास बैङ्क समूहको परिसूचक शून्य दशमलव ९७ प्रतिशत, ‘अन्य’ समूहको शून्य दशमलव ४ प्रतिशत र होटलको शून्य दशमलव २४ प्रतिशत घटेको हो ।