प्रधानमन्त्री पुष्पकमल दाहाल प्रचण्ड र चिनियाँ राष्ट्रपति सी जिनपिङबीच शनिबार गोवामा भेटवार्ता भइरहेका बेला भारतीय प्रधानमन्त्री नरेन्द्र मोदीको आकस्मिक उपस्थितिलाई लिएर एमाले स्थायी समिति सदस्य शंकर पोखरेलले प्रश्न उठाएका छन् ।

नेपाल भारत चीनबीच कतिपय विषयमा त्रिपक्षीय वार्ता आवश्यक भए पनि त्यो तीनै पक्षको जानकारीमा हुनुपर्ने उनको जीकिर छ । दुईपक्षीय वार्ता चलिरहेका बेला भएको आकस्मिक प्रवेश कसरी सकारात्मक हुनसक्ला ? भन्दै पोखरेलले प्रश्न उठाएका छन् ।

उनले सामाजिक सञ्जाल फेसबुकमार्फत आफ्नो धारणा राखेका हुन् । सोमबार प्रचण्ड र जिनपिङबीच दुई पक्षीय वार्ता चलिरहेका बेला भारतीय प्रधानमन्त्री मोदी पनि आइपुगेका थिए । त्यसपछि तीनवटै पक्षबीच त्रिपक्षीय हितबारे कुराकानी भएको थियो ।

के लेखे पोखरेलले फेसबुकमा ?

नेपाल र चीनबीच दुई पक्षीय छलफल चलिरहँदा मोदीको अचानक प्रवेश भयो रे ! मोदीको त्यस प्रकारको प्रवेशलाई सकारात्मक रुपमा चित्रण गर्ने काम पनि हुँदैछ । निश्चयनै कतिपय सन्दर्भमा नेपाल, भारत र चीनबीच त्रिपक्षीय छलफल आवश्यक पनि छ । तर त्रिपक्षीय छलफल वा वार्ता तीन पक्षको पूर्वजानकारी र योजनामा हुने होला । यदि आकस्मिक प्रवेश भएको हो भने यो कसरी सकारात्मक विषय हुनसक्ला ? मोदीले आफ्नो आकस्मिक सहभागिताको कारण के बताए होलान् ? त्यसले त चिनियाँ राष्ट्रपतिको नेपालमा हुने भनिएको अवरुद्ध भ्रमण पुनः अघि बढाउन तथा दुई देशबीच सहयोग र सम्बन्धको सकारात्मक वातावरण बनाउने नेपाली प्रमको कोसिसमा आयोजना गरिएको दुइपक्षीय वार्तासमेत अवरुद्ध भयो होला । यस विषयलाई नेपाली प्रम र चिनियाँ राष्ट्रपतिले कसरी लिनुभयो होला ? अनेकन् प्रश्नहरु यसबाट उपस्थित भएका छन् । यसबाट अन्तर्रा्ष्ट्रिय मामिलामा नेपाल र भारतबीच ‘समानधारणा’ बनाउने सन्दर्भको भारतको तर्फबाट अतिरिक्त सक्रियता देखाइएको हो कि ? यस्तो विषयलाई अन्तर्रा्ष्ट्रियस्तरमा र विशेषगरी कुटनीतिक क्षेत्रमा कसरी लिइन्छ ? कुटनीतिक क्षेत्रका ज्ञाताहरुको धारणा समयमै आउनु राम्रो हो ।