बर्षमा एक पटक आउने दशैं पर्व धेरै नेपालीका लागि दशा साबित बन्नेगर्दछ । दशैंमा लागेको ऋण तिर्न कि त घरखेत बन्धक राखेर खाडी भासिन्छन वा  मुग्लान पस्छन । तर, हाम्रा देशका अधिंकाश नेताहरुलाई एक पटक सत्तामा पुगेपछि उनीहरुलाई सदाबहार दशैं आँउछ ।

नपत्याए हेर्नुहोस त सत्ताबाट बाहिरिने बित्तिकै पूर्ववर्ती मन्त्रीहरुले धमाधम करोडौं पर्नै वंगला खरिद गरिरहेको । राष्टवादी कहिएका ओली सरकारबाट बाहिरिएलगत्तै उक्त सरकारका दुई उपप्रधानमन्त्रीले राजधानीमा अलिसान बंगला खरिद गरेका छन ।

सरकारबाट बाहिरिए लगत्तै मधेसी जनअधिकार फोरम लोकतान्त्रिका  अध्यक्ष तथा ओली सरकारका उपप्रधानमन्त्री विजयकुमार गच्छदारले  बुढानिलकण्ठ नगरपालिका वडा १० मण्डिखाटारस्थित सात करोड रुपैंयाको बंगला खरिद गरेका थिए । उनले सुशील शम्सेर राणाको २७ आना जग्गामा बनेको  बंगला ७ करोडमा खरिद गरेका थिए ।

पटक पटक गरी हालसम्म ११ पटक मन्त्री बनिसकेका गच्छदारलाई समेत माथ खुवाउने गरी अर्काे कम्युनिष्ट नेता सिपि मैनालीले समेत डिल्लीबजारमा हालै मात्र बंगला खरिद गरेका छन । चारखाल नजिकै पूरानो धिम्ले अपसेट पछाडि आठ आना जग्गामा बनेको पाँच तले घर उनले छोरा सरोज मैनालीको नाममा पास गराएका हुन । यस अगाडि सोही स्थानमा उनको अर्काे घर छ । सो घरमा छोरा सरोजले गल्र्स होस्टल चलाँउदै आएका छन ।

सोही होस्टलसँगै जोडिएको रातो रंगको उक्त बंगला सात करोडमा खरिद गरिएको हो । सिपी मैनालीको नाममा राजधानीमा मात्र चारवटा बंगला छन । डिल्लीबजारका दुईवटा,रातोपुलमा पार्टी कार्यलय रहेको भवन र चावहिलस्थित उनी बस्र्दै आएको बंगला ।

यस अगाडि पूर्व अर्थमन्त्री रामशरण महतले समेत वूढानिलकण्ठमा झण्डै सत्र करोड रुपैंयामा जग्गा खरिद गरी त्यहाँ नयाँ बंगला निर्माण गर्दैछन ।