एजेन्सी – तपाईं आफूलाई मन परेको सेलिब्रेटीको सामान किन्न पाउँदा कति रकम तिर्न तयार हुनुहुन्छ ? भर्खरै अभिनेतृ मर्लिन मुनरोको अलिकति कपालको मूल्य उनका एक फ्यानले ४० हजार डलरमा किनेका छन् ।

लस एन्जलसस्थित जुलियन्स अक्सन हाउसमा मुनरोको दुई गुच्छा कपाल सो मूल्यमा बिक्रि भएको हो । न्युयोर्कका ३१ वर्षीय व्यापारी रेमी गंगरोसाले सो रकम तिरेर मुनरोको कपाल किनेको बताइएको छ । कपाल किनिसकेपछि गंगरोसाले आफू मर्लिन मुनरोको विरासतको एक पाटो बन्नका लागि उनको कपाल किनेको प्रतिक्रिया दिए ।

गंगरोसाले आफूले मुनरोको कपाल किनेलगत्तै त्यसलाई बेच्नका लागि आग्रह गरेको जनाएका छन् । तर आफूले त्यसलाई नबेच्ने उनले बताए ।

जुलियन्स अक्सन हाउसले सेलिब्रेटीहरुका सरसामान लिलामीमा राखेर उच्च मूल्यमा बेच्ने गरेको छ । त्यसबाट प्राप्त रकम च्यारिटीमा खर्च हुने बताइन्छ । जुलियन्स अक्सनले यसअघि माइकल ज्याक्सन, एल्भिस प्रिस्ले, विलियम स्यान्टरका सामानहरु लिलामी मार्फत बेचिसकेको छ। यसले मोजादेखि मृगौलाको पत्थरीसमेत बेच्ने गरेको छ ।