नेपालमा खेलकुदको बिकास गर्ने दायित्व बोकेको राष्ट्रिय खेलकुद परिषद् आँफैसँग कति सम्पति होला , तपाईं अनुमान गर्न सक्नुहुन्छ ? पक्कै सक्नुहुन्न ! किन भने सम्पतिको मालिक परिषद्लाई पनि आफ्नो सम्पत्तिको लेखा जोखा छैन भने अरुलाई कसरी याद हुनु !

खेलाडीलाई भत्ता खुवाउन , कर्मचारीलाई तलव दिन र पदाधिकारीलाई विदेश घुम्न सरकारकै मुख ताक्ने मगन्ते मानसिकता बोकेको परिषद्लाई आफ्नो सम्पतिको लेखा राख्ने फुर्सद पनि कसरी हुनु र ? खेलकुद मन्त्रालयका एक वरिष्ठ अधिकारीका अनुसार – राष्ट्रका सवै संघ सस्था र सरकारी सस्थान मध्ये सवै भन्दा धेरै भौतिक सम्पत्ती भएको संस्था खेलकुद परिषद् हो ।  तर कस्तुरी मृगले आफ्नो नाभिमा रहेको वास्नाको अस्तित्व थाहा नपाए जस्तै राखेपलाई आफ्नो सम्पतिको अस्तित्ववारे ख्यालै छैन ।

सम्पति कति ?

हामीले एक साता देखी परिषद्का सदस्य सचिवलाई सोधी रहयौ , परिषद्को भौतिक सम्पति कति छ भनेर । तर नेकपा एमालेको राष्ट्रिय खेलकुद महासंघ हुँदै परिषदको कमाण्ड सम्हाल्न पुगेका सदस्य सचिव केशव कुमार बुढाथोकीले आफ्नै सम्पतिको अांकडा वताउन सकेनन वा चाहेनन ।

 उनले नबताएपछि हामीले अन्य श्रोतवाट देशका विभिन्न स्थानमा गरेर परिषदको नाममा ३ हजार ६ सय ७० रोपनी जग्गा रहेको तथ्य फेला पार्यौ । तर परिषद्  भने आफ्नो जग्गा कहाँ र कुन अवस्थामा छ भन्ने मै वेखबर छ । परिषद्का पदाधिकारी आफ्नो सम्पत्तिको तथ्याङ्क थाहा पाउदा जिब्रो टोक्छन । परिषद्का एक पदाधिकारी भन्छन्  – परिषद् यति धनी छ भन्ने कुरा त हामीलाई थाहै थिएन ।

हरायो ७ सय रोपनी

परिषद्को नाममा रहेको तर परिषद् चाल नै नपाएको जग्गा ७ सय रोपनी रहेको छ । काठमाण्डौ , दाङ , गुल्मी ,ताप्लेजुङ , र पर्वत लगयतका ठाँउमा रहेको सयौ रोपनी जग्गा अहिले अरु कसैले प्रयोग गरिरहेका छन् । तर लाचार र वेखबर परिषद् आफ्नो जग्गा खोज्न चाहदैन ।

राजनीतिक पार्टीको फेरो समाएर परिषद्  प्रवेश गरेका कर्मचारी तन्त्र , गुण्डागर्दी र चाकडी बाट वनेको परिषद् नेतृत्व परिषद्को सम्वृद्धिमा लाग्ने कुरै भएन । परिणाम त दाङको ६० विघा भन्दा बढी जग्गा सुकुम्बासीको नाममा स्थानीय राजनीतिक दलले कव्जा गरेका छन । तर परिषद चुपचाप छ ।

काठमाण्डौका विभिन्न स्थानमा रहेको जग्गा र सम्पतिमा पनि विवाद छ । पछील्लो पटक नेपालमा आयोजना गरिएको सागमा इनडोर गेमका लागि चिनियाँ सरकारले वनाइदिएको लैनचौरको कवर्ड हलको छानो चुहिन थालेको छ । भित्ता खुइलिएका छन । खासगरी व्याडमिन्टन र टेवलटेनिसको प्रशिक्षणका लागि बनाइएको उक्त कवर्ड हल प्रशिक्षाणका योग्य अवस्थामा छैन । बरु त्यसको स्वामित्वलाई लिएर काठमाण्डौ महानगरपालिका र परिषद्बिच विवाद छ ।