- अर्थ सरोकार सम्बतदाता
गुल्मी – हर्दिनेटा गाविस वडा नम्वर ८ वाँसखर्कका ३२ वर्षिय रामबहादुर नेपाली श्रीमती विभिन्न संघ संस्था तथा श्रीमानले पठाएको पैसा लिएर वेपत्ता भए पछि दुई महिनामा नै घर फर्किन बाध्य भएका छन् । छिटै घर फर्किनु भन्दै आशु बहाउदै बिदाई गर्ने श्रीमति दु्र्गा नेपाली एकाएक बेपत्ताको खबर पाए पछि घरमा स–साना बालबालीकाहरुको विचल्ली हुने डरले महिना दिनमै घर फर्केका हुन् । गुल्मीकै नयाँ गाउँमा माईती घर भएकी उनकी श्रीमति दुर्गा नेपाली भदौं २९ गते देखि घरबाट बेपत्ता भएको पिडित नेपालीले बताए ।
त्यस दिन विहान करिब ९ बजेको समयमा छोरा छोरीलाई स्कुल जाउ भनेर घरबाट हिडेको बताईएको छ । यस अघि पनि दुवईको सारजामा दुई तिन पटक आवत जावत गर्ने नेपाली दुई महिना अघि मात्र घर आएर गएको बताउँछन् ।घरमा ८ वर्षका एक छोरा र १० वर्षकी एक छोरी छाडेर ३ वर्षको काखका एक छोरा लिएर घरबाट हिडे पछि उनको फोन स्वीचअफ हुन छाडेकोले माईतीमा सम्पर्क गरिएको र तिजमा उनि माईतीमै रहेको जानकारी परिवारले दिएको उनले बताए ।
धेरै संघ संस्थाबाट र श्रीमानले ऋण तिर्न पठाएको रकम सहित ६ लाख रुपैयाँ हिनामिना गरेको आरोप श्रीमानले लगाएका छन् । उनले खोजतलासका लागि जिल्ला प्रहरी कार्यालय गुल्मीमा जाहेरी समेत दिएको बताए ।
यस सम्वन्धमा ति महिलाको माईती घर नयाँगाउँ ६ मा सम्पर्क राख्दा उनकी आमा रुपा नेपालीले छोरी तिजमा आउदा आफुहरुले नचिनेको मान्छे संगै लिएर आएको बताईन् । “हामीले चिनेका थिएनौं एउटा केटा संगै आयो दरखाने दिन र पञ्चमीका दिन सम्म वसेर संगै गएका हुन्” उनले भनिन् “छोरीले फुपू पर्नेका छोरा हुन् भने पछि विश्वास गरेर राखेका हौं ।” निज युवाले आफ्नो मावली गुल्मीकै विरवास बताएको र घर वुटवल बताएको उनले बताईन् ।
उक्त युवाले गाडी चलाउने काम गर्छु भनेको उनको भनाई छ । तिज जस्तो चाड पर्वमा छोरी संगै आएको मान्छेलाई स–सम्मान राखेर छोरी संगै पठाएको दोश्रो दिन म घर आएर छोरी विरामी परेर उपचार गर्दै छु भनेको तर दोश्रो दिन देखि मोवाईल स्वीच गरेर छोरीले पिर चिन्तामा पारेको उनकी आमाले बताईन् ।
उनले यस अघि छोरी कहिल्यै गलत बाटोमा नहिड्ने गरेको , ज्वाईले विदेशमा कमाए पनि छोरीले यहाँ बचाएर सम्पत्ती जोरेको बताउँदै छोरी त्यसरी कसैसंग जान नसक्ने वरु कसैले मारेकी भन्ने पिरले आफुहरु निद न भोक भएको पिर चिन्ता सुनाईन् । उनले छोरीको सास कि लास भेटाई दिन सवैको सहयोगको अपिल समेत गरिन् ।
उता उनका श्रीमानले श्रीमती आफुलाई छाडेर कतै जान नसक्ने भन्दै जहाँ भए पनि र कतै कुनै गलत मान्छेले फसाएको भए पनि घरमा आएर छोरा छोरी सम्हाली दिन आग्रह गरेका छन् । विवाह भए देखि श्रीमतिले आफुले कमएको जोगाएको र माया पनि निकै दिने गरेकोले आफुले विर्सन नसक्ने भन्दै उनले श्रीमति प्रति वेहत प्यार कायमै रहेको बताए । छोरा छोरीहरुले पनि सम्पर्कमा आउन आग्रह गरेका छन् । त्यो परिवारले वेपत्ता उनको तस्वीर समेत दिएर कोही कसैले कतै देखे भेटे प्रहरीमा खवर गरी दिन आग्रह गरेका छन् ।
