">
काठमाडौँ – जम्बु–काश्मीरको उरीमा भएको घटनापछि भारत र पाकिस्तानबीच सितयुद्ध चलिरहेका बेला दुवै देशका मिडियाले एकअर्कालाई दोष थोपरिरहेका छन् ।
भारतीय मिडियाले पाकिस्तानको खुलेरै विरोध गरिरहेका बेला पाकिस्तानी मिडियाले पनि भारतविरुद्ध धावा बोलिरहेका छन् ।
पाकिस्तानको उर्दू दैनिक औसाफलाई उद्धृत गर्दै बीबीसी हिन्दीले जनाएअनुसार पाकिस्तानले नेपाल र भुटानको उदाहरण दिँदै भारतलाई चेतावनी दिएको छ ।
समाचारमा जनाइएअनुसार पाकिस्तानले आफूहरुसँग परमाणु शक्ति नभएको भए यतिबेलासम्म भारतले सैन्य कारबाही गरिसक्ने बताउँदै भनेको छ, ‘हामी युद्ध चाहदैनौँ । तर हामी भुटान र नेपाल पनि होइनौँ ।’
नेपाल र भुटानलाई भारतले दबाएर राखेको उल्लेख गर्दै पाकिस्ताले आफूहरुलाई त्यसैगरी दबाउने चेष्टा गरिए युद्धका लागि तयार हुन संकेत गरेको बुझिन्छ ।
त्यसैगरी पाकिस्तानको अर्को पत्रिका ‘जंग’ दैनिकले सम्पादकीयमार्फत भारतले उरी हमलाको बहाना बनाएर लडाइको माहोल बनाउने कोशिस गरिरहेको बताउँदै पाकिस्तान जवाफ फर्काउन तयार रहेको लेखेको छ ।
