काठमाडौं – नेकपा माओवादी केन्द्रका नेता मणी थापाले अख्तियार दुरुपयोग अनुसन्धान आयोगले गलत समयमा गलत कदम चालेको आरोप लगाएका छन् ।

अदालतले नै अख्तियार प्रमुखको नियुक्तिलाई लिएर प्रश्न चिन्ह खडा गरिरहेको वेला अख्तियारले लडाकू घोटाला काण्ड उचालेर बार्गेनिङ गर्न खोजेको उनको आरोप लगाए ।

बुधबार रिपोर्टर्स क्लब नेपालले आयोजना गरेको साक्षात्कारमा थापाले भने, ‘प्रधानमन्त्री भारत भ्रमणमा गएको वेला बेलुका पत्रकार सम्मेलन गरेर अख्तियारले गलत कदम चालेको छ, यो गलत समयको गलत कदम मात्रै हो । हामी कडा रुपमा प्रतिवाद गर्छौं ।’

प्रधानमन्त्री प्रचण्डको भारत भ्रमण सफल भएकोले एमालेले आत्तिएएको माओवादी नेता थापाले बताए । उनले प्रधानमन्त्रीको भारत भ्रमणको कुरालाई लिएर दुईपक्षीय सम्झौतालाई भाँड्न खोजेको आरोप लगाए । उनले भने, ‘एमाले आत्तिएको छ, द्धिपक्षीय सम्बन्ध सुमधुर भएको छ, छिमेकीसँगको सम्बन्ध प्रगाढ भएकोमा कसैले दुःख मान्नुहुँदैन ।’