काठमाडौं – नेकपा एमालेका अध्यक्ष केपी शर्मा ओलीलाई अध्यक्ष वा संसदीय दलको नेता मध्ये एक रोज्न उपमहासविच घनश्याम भूसालले लिखित प्रस्ताव राख्ने भएका छन् । बुधबारदेखि सुरु भएको एमाले केन्द्रीय समितिको बैठकमा फरक मत राख्दै उपमहासचिव भूसालले पार्टी अध्यक्ष वा संसदीय दलको नेता मध्ये एक पद छोड्न आग्रह गरेका छन् ।

एमाले केन्द्रीय समिति बैठकका लागि ओलीले ३२ पेज लामो राजनीतिक प्रतिवेदन लखेका छन् । ओलीको प्रतिवेदनमा मत राख्दै भूसालले २६ पेज फरक मत राखेका छन् । भूसालको फरक मतमा एमालेभित्रको गुटबन्दी मुख्य बिषय बनेको छ भने अध्यक्ष ओलीलाई दवाव दिइएको छ ।

अध्यक्ष ओलीले लामो समयदेखि ‘एक ब्यक्ति एक पद’ को कुरा उठाउँदै आएपनि आफ्नो हकमा भने लागु नगरेको आरोप फरक मतमा उल्लेख गरेका छन् । ‘एक व्यक्ति एक पदको नारा लगाएर जितेपछि कि त दलको नेताबाट राजिनामा दिनुपर्थ्यो कि त्यो नारा नै गलत थियो भन्नुपथ्र्यो । आफूलाई जे फाइदा हुन्छ, त्यही पद्धति हो भन्ने कुरा यसबाट स्थापित भइसक्यो’ भूसालले आफ्नो प्रतिवेदनमा भनेका छन् । उनले आफ्नो पुरानो नारालाई कार्यान्वयन गर्न अध्यक्ष ओलीसँग आग्रह पनि गरेका छन् ।

उता ओलीले भने आफ्नो प्रतिवेदनको मुख्य एजेण्डा प्रधानमन्त्री पुष्पकमल दाहाल प्रचण्ड र उनका गतिविधिलाई बनाएका छन् । दाहालले मधेसी मोर्चासँग गरेका सम्झौता, संविधान संशोधनको बिषय भारतमा छलफल गरेको र भारत र नेपालका प्रधानमन्त्रीबीच संयुक्त बिज्ञप्तीलाई आधार बनाएका छन् ।

ओलीले प्रतिवेदनमा प्रधानमन्त्रीलाई निशाना साँधे पनि भूसालले ओलीलाई नै निशाना नबाएका छन् । तर ओलीले राष्ट्रिय, अन्तराष्ट्रिय विषयमा उठाएका कुरामा भने सहमति जनाएका छन् ।