काठमाडौं । प्रहरीभित्र क्षमताबान र अब्बल मानिने डीआइजी अख्तियारबाट लखेटिएका छन् । अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीको आदेश नमानेको र सुचना लिग गरेको आरोपमा उनलाई अख्तियारबाट तानिएको छ ।

अनुसन्धानमा डीआइजी हेमन्त मल्ल अब्बल प्रहरी उच्च अधिकृत मानिन्छन् । तर उनलाई अख्तियार प्रमुख आयुक्त कार्कीको मागमा प्रहरी प्रधान कार्यालयले जगेडामा तानेको छ । प्रहरी महानिरीक्षक उपेन्द्रकान्त अर्यालका अति विश्वास पात्र हुन मल्ल । तर अख्तियार प्रमुखले जिकिर गरेपछि मल्ललाई तान्न आइजीपी बाध्य भएको स्रोतले बताएको छ ।

अख्तियार प्रमुख कार्कीले डीआइजी मल्ल आफ्नो भन्दा आइजीपी अर्यालकोे इन्टेस्टमा चलेको भन्दै गृहमन्त्री विमलेन्द्र निधिलाई पनि उनले सरुवाका लागि आग्रह गरेका थिए । गृहमन्त्रीले पनि चर्काे दवाव दिएपछि आइजीपी अर्याल बाध्य भएका हुन् ।

डिआईजी मल्ल सात महिना अघि केन्द्रीय अनुसन्धान ब्युरो (सीआइबी)बाट अख्तियारमा गएका थिए । मल्ललाई तान्न गृहमन्त्री स्तरिय निर्णय समेत गरिएको थियो । कार्यबहाक प्रधानमन्त्री भएकै दिन निधिले अख्तियारका डीआईजी मल्लालाई सिकार बनाएका छन् ।

मल्ललाई तानेपछि आयोगमै कार्यरत एसएसपी योगेश्वर रोमखामीलाई कामको जिम्मा दिइएको छ । तत्काल कुनै डीआइजी नपठाएर रोमखामीबाटै अख्तियारको सुरक्षा ब्यवस्था गर्ने तयारी गृहले गरेको छ । केही समयअघि अख्तियारका पूर्वाञ्चल प्रहरी प्रमुख एसपी लालमणि आचार्यलाई पनि फिर्ता बोलाइएको थियो ।

अख्तियारको गोप्य सूचना आईजीपीसँग अर्याललाई दिएको मल्ललाई आरोप लागेको छ । डिआईजी मल्ल प्रहरी संगठनमा आईजीपी अर्याल निकट मानिन्छन् । सिआईबीमा हुँदा न्यायाधिश रणबहादुर बम र रानीवारी हत्याकाण्डको सफल अनुसन्धान गरी दोषीलाई कारवाहीको दायरामा ल्याएका थिए ।