काठमाडौँ – नर्भिकमा नवनिर्मित ‘लून–गङ्गा अपरेटिङ्ग सुइट्स्’को अर्थमन्त्री कृष्णबहादुर महराले उद्घाटन गरेका छन् । नर्भिक इन्टरनेशनल हस्पिटलमा नवनिर्मित अत्याधुनिक प्रविधिले सुसज्जित एवम् जेसीआई मापदण्ड बमोजिम निर्माण गरिएको विश्वस्तरीय शल्यक्रिया कक्षको उपप्रधान तथा अर्थमन्त्री महराले बुधबार उद्घाटन गरेका हुन् ।

नवीनतम् र अत्याधुनिक शल्यक्रिया सुइट्स्मा युरोपेली स्तरका ३ वटा शल्यक्रिया कक्षहरू, प्रि एण्ड पोष्ट अपरेटिभ वार्ड, सर्जिकल इन्टेन्सिभ केयर युनिट , बिरामी परामर्श लाउञ्ज, केन्द्रीय निर्मलीकरण विभाग, फार्मेसी, चिकित्सक लाउञ्ज नर्स स्टेशन लगायतका सम्पूर्ण सेवा/सुविधाहरू एउटै तल्लामा रहेको अस्पतालले जानकारी दिएको छ ।

अस्पतालका अनुसार शल्यक्रिया कक्ष पूर्ण रुपमा संक्रमणरहित रहेको छ भने यसको निर्माणमा प्रयोग भएका प्यानेलहरू अग्नी निवारक, भार बहन गर्ने क्षमता अत्यधिक भएको, टुटफुट नहुने र धातुरहित भएकाले खिया लाग्ने, खिइने, बाङ्गिने आदि नभई विशुद्ध युरोपेली मापदण्ड बमोजिमका हुनुका साथै कुनै रसायनले नपग्लिने, नघोलिने प्रकृतिका छन् ।

निर्माणमा प्रयोग भएका सामग्री तथा उपकरणहरू अमेरिकी खाद्य तथा औषधि नियोगबाट प्रमाणित भएकाले विकसित मुलुकहरूमा व्यापक रुपमा प्रचलित छन् ।

उद्घाटन समारोहलाई सम्बोधन गर्दै उपप्रधान तथा अर्थमन्त्री कृष्णबहादुर महराले नर्भिकको स्तरीय स्वास्थ्य सेवाका कारण समाजमा लोकप्रिय रहेको बताए । उनले त्यस्ता नयाँ प्रविधियुक्त सेवा सुविधा थपिँदा यसको विश्वसनीयता अझै बढ्ने विश्वास व्यक्त गरे । स्वास्थ्य क्षेत्रमा भएका तमाम कमी कमजोरी सच्याएर अघि बढ्न नयाँ सरकार तयार रहेको समेत उनले बताए ।

उपप्रधान तथा अर्थमन्त्री महराले उद्घाटन गरिएको सुइट्स्का सबै कक्षहरू अभिरुचीपूर्वक अवलोकन गरेका थिए । मन्त्री महराले हस्पिटलका अन्य कक्षहरूको पनि भ्रमण गरेका थिए । नर्भिकका अध्यक्ष बसन्त चौधरीले आम नेपालीले स्तरीय स्वास्थ्य सेवा आफ्नै घरदैलोमा पाउनुपर्छ भने । उनले विश्वकै उत्कृष्ट प्रविधि भित्र्याउनुपर्छ भन्ने आफ्ना पिताको सपना पूरा गर्न विगत २५ वर्षदेखि आफू लागिपरेको धारणा राखे ।

यसै वर्ष दुई सय शैयायुक्त अत्याधुनिक प्रविधिसहितको नयाँ भवन, आवाजविहिन अति विशिष्ट एमआरआई., २ सय ५६ स्लाइसको सीटी स्क्यान आदि थप्ने तयारी भएको पनि चौधरीले जानकारी दिए । २ महिनाभित्रै अत्याधुनिक प्रविधिसम्पन्न निःसन्तान केन्द्र र हेमो डायलाइसिस सेन्टर थप्ने, नर्भिकको स्याटलाइट सेन्टरका रुपमा पोखरा र विराटनगरमा बहुआयामिक र विशिष्टस्तरका स्वास्थ्य संस्थाहरूको सुरुवात गरिने, दक्षिण भारतको प्रसिद्ध क्यान्सर हस्पिटलसँगको सहकार्यमा एक सय शैयायुक्त छुट्टै अत्याधुनिक क्यान्सर हस्पिटल सञ्चालनार्थ काम सुरु गर्ने जस्ता महत्वाकांक्षी योजनाहरू रहेको पनि चौधरीले जानकारी दिए ।

चौधरीले राष्ट्रमा प्रविधिको विकास गर्ने हो भने सरकारले नाजायज कर, भन्सार शुल्क र दस्तुरहरू हटाउनुपर्ने धारणा पनि राखे । उनले दुुर्गम क्षेत्रमा रहेका साना स्वास्थ्य केन्द्रहरूलाई डेडिकेटेड विद्युतीय लाइन नदिनेजस्ता भेदभाव सरकारले गर्नु नहुने धारणा समेत चौधरीले राखे । कार्यक्रममा स्वागत मन्तव्य राख्दै नर्भिककी प्रबन्ध निर्देशक मेघा चौधरी शाक्यले नर्भिकको सेवास्तर विश्वस्तरीय पार्न हर सम्भव प्रयास गरिने बताइन् ।

नर्भिकका चिकित्सा निर्देशक डा. पङ्कज जलानले ‘लून–गङ्गा अपरेटिङ्ग सुइट्स्’ युरोपेलीस्तरको र जेसीआई मापदण्ड बमोजिमका उपकरण तथा सामाग्री प्रयोग भएको अत्याधुनिक शल्यक्रिया कक्ष भएकोले यसले बिरामीहरूलाई विश्वस्तरीय शल्यचिकित्सा सेवाको अनुभूति दिने बताए । कार्यक्रममा नर्भिकका कार्यकारी निर्देशक राजेन्द्रबहादुर सिंहलगायतले बोलेका थिए ।

यसैबीच नर्भिक इन्टरनेशनल हस्पिटलले सञ्चारकर्मी तथा उनीहरूका परिवार सदस्य (आमा/बुबा/श्रीमान्श्री/मती तथा छोराछोरी) हरूलाई स्वास्थ्य परीक्षण प्याकेज एवम् जाँच सेवाहरूमा १० प्रतिशत छुट दिने निर्णय गरेको छ । उक्त छुटका लागि कुपनको व्यवस्था गरिएको छ । कुपन ३० दिनसम्मका लागि मान्य हुनेछ । यसैगरी नव उद्घाटित अपरेशन थिएटर (ओटी) बाट सेवा सुरु भएको १ हप्तासम्म सबैखाले शल्यक्रियामा १० देखि १५ प्रतिशत छुट दिने पनि घोषणा गरिएको छ ।