काठमाडौं – सभापति शेरबहादुर देउवासँग असन्तुष्ट नेपाली कांग्रेसका नेता खुमबहादुर खड्काले महिला संघमा बरिष्ठ नेता रामचन्द्र पौडेल पक्षधर उम्मेद्धारलाई सघाउने भएका छन् । पार्टी महाधिबेशनका बेला उपसभापति बनाउने सहमति गरेका देउवाले धोका दिएको भन्दै खड्का असन्तुष्ट बन्दै आएका छन् । देउवा पक्षलाई महिला संघमा हराउन खड्काले आफु निकट महिला नेत्री पुष्पा भुसाललाई जिम्मेवारी दिएका छन् । पौडल पक्षबाट महासचिव उम्मेद्धार बनेकी गोमा केसी खड्का निकट हुन् ।
महिला संघमा पौडेल र खड्काले अनौपचारिक साँठगाँठ गरेका छन् । ‘पौडेल र खड्काबीच दुई दिनसम्म लगातार छलफल भएपछि चुनावी तालमेल भएको हो’ उनी निकट एक कांग्रेस नेताले भने ‘महिलासंघमा देउवा र सिटौला, पौडेल र खड्काबीच सहकार्य भएको छ ।’ महिला संघमा नेत्री पुष्पा भूसाल निकै लोकप्रिय छन् । पौडेल र खड्काले आफ्नो प्यानललाई चुनाव जिताउन भुसाललाई जिम्मेवारी दिएका छन् । दुवै नेताबाट जिम्मेवारी पाएपछि भुसाल रातदिन खट्न थालेको महिला संघका प्रतिनिधिहरुले बताउन थालेका छन् ।
पौडेल पक्षकी उम्मेद्धार मिना पाण्डेलाई जिताउन भुसाल, पार्टी कोषाध्यक्ष तथा मन्त्री सीतादेवी यादव, गिरिजा पुत्री सुजाता कोइरालाले अभियान थालेका छन् । पौडेल र खड्का पक्षका पदाधिकारी र केन्द्रीय सदस्यको अन्तिम टुंगो लगाउने जिम्मा पनि यी तीन नेत्रीलाई छ । मन्त्री सितादेवी यादवले मन्त्रालयबाटै प्रतिनिधिहरुसँग संवाद गरिरहेकी छिन् भने भुसाल प्रत्येक प्रतिनिधीहरुलाई ब्यक्तिगतरुपमा भेट्दै हिडेकी छिन् । महिला संघको अध्यक्षमा सुजाता कोइरालालाई सर्वसम्मत बनाउन पौडेलले सभापति देउवालाई एक साताअघि प्रस्ताव गरेका थिए । तर देउवाले पौडेलको प्रस्ताव अस्वीकार गरेपछि देउवा पक्षकी उम्मेद्धार उमा अधिकारीलाई हराउन सुजाताले कम्मर कसेकी छिन् ।
उता उमा अधिकारीलाई जिताउन देउवा पत्नी आरजु र पूर्वमन्त्री चित्रलेखा यादव लागेका छन् । चित्रलेखा यादवलाई मधेस र तराई क्षेत्रको जिम्मा लगाइएको छ भने अन्य क्षेत्र आरजुले समालेकी छिन् । दुवै नेत्रीलाई आफ्नो पक्षका उम्मेद्धार जिताउन सभापति देउवाले निर्देशन दिइसकेका छन् । त्यसैगरी देउवा पक्षबाट सरकारमा सहभागि मन्त्रीहरुले पनि प्रनिनिधिलाई निरन्तर फोन सम्पर्क गरिरहेका छन् ।
- एस काठमाडौँ
