काठमाडौं – आसन्न भारत भ्रमणको पूर्वसन्ध्यामा प्रधानमन्त्री पुष्पकमल दाहाल प्रचण्डले बोलाएको पुर्वप्रधानमन्त्रीहरुको बैठकमा एमालेका अध्यक्ष तथा पूर्वप्रधानमन्त्री केपी शर्मा ओली उपस्थित भएनन् । प्रधानमन्त्री दाहालले भारत भ्रमणका बिषयमा सुझाव माग्न मंगलबार पुर्वप्रधानमन्त्रीहरुलाई सरकारी निवास बालुवाटार बोलाएका थिए । तर एमाले अध्यक्ष तथा पूर्वप्रधानमन्त्री ओली र एमाले वरिष्ठ नेता तथा पूर्वप्रधानमन्त्री झलनाथ खनाल उपस्थित भएनन् ।

३० भदौमा प्रधानमन्त्री दाहाल राजकीय भ्रमणमा दिल्ली जाँदैछन् । भारत जानु पूर्व दाहालले ब्यापारी, कुटनीतिक नियोगका जानकार र पूर्वपरराष्ट्रमन्त्रीहरुसँग छलफल गरेपछि पूर्वप्रधानमन्त्रीलाई बालुवाटारमा बोलाएका थिए । प्रचण्डले बोलाएको बैठकमा डा. बाबुराम भट्टराईदेखि सवै उपस्थित भएपछि एमालेका दुई नेता तथा पूर्वप्रधानमन्त्रीहरु उपस्थित भएनन् । तर एमाले नेता माधव नेपाल भने बैठकमा सहभागि भएका थिए ।

‘भारत भ्रमणका बिषयमा हाम्रो पार्टीका अध्यक्षले लिखितरुमै प्रधानमन्त्रीलाई सुुझाव दिइसक्नु भएको छ’ एमाले संसदीय दलका सचेतक भानुभक्त ढकालले भने ‘एउटै बिषयमा बारम्वार छलफल गर्न जाने कुरा राम्रो होइन ।’ एमालेले ७ बुँदे लिखित सुझाव प्रधानमन्त्री कार्यालय पुगेर बुझाएको थियो ।

नेपालको इतिहाँसमा प्रधानमन्त्री भएर पनि भारत भ्रमण नजाने ब्यक्ति हुन झलनाथ खनाल । भारत भ्रमणका बिषयमा आफुसँग कुनै ज्ञान नभएको जानकारी उनले प्रधानमन्त्री दाहाललाई गराइसकेका थिए ।