काठमाडौँ – मकवानपुरको उत्तरी क्षेत्रमा रहेका चित्लाङग गाविसमा बँदेलले बालीनाली सखाप पार्न थालेपछि स्थानीयबासी बारीमै जाग्राम बस्न थालेका छन् । रातको समयमा बँदेलको समूह आएर मकै, कोदोलगायतको बाली नाली नष्ट गर्न थालेपछि स्थानीय बालीनाली जोगाउन रातभर बारीमै जाग्राम बस्न थालेका हुन् ।  

मकै पाक्न लागेको समयमा नजिकैका जङ्गलबाट बँदेलको समूह आएर माझगाँउ, कुच्वु , भन्दारखर्क, बिचारीठोक र खर्क का स्थानीयले लगाएको बालीनाली सखाप पार्न थालेपछि उनीहरु चिन्तित हुन थालेका छन् । बँदेलको समूहले मकै, भतमास, सिमी, पिडालु, तरुललगायतका बाली नाली नष्ट पारेको माझगाउँ– ५ का राजन बलामीले जानकारी दिए ।

“बर्सेनी पाक्न लागेको बाली नष्ट गरेर बँदेलले दुःख दिन थाले, बालीनाली जोगाउन बारीमै रातभर जाग्राम बस्नुपर्ने भयो,” बलामीले भने । लगातार तीन वर्षदेखि बँदेलको समूहले चित्लाङ्ग वडा नं ४ र ५, देवस्थलको २, १ र ८  वडामा करिब २०० रोपनीमा लगाएको बाली सखाप पारेको स्थानीयको भनाइ छ ।

बँदेलको समूहले सबैभन्दा बढी मकैबालीमा क्षति पुर्याएको स्थानीयले जानकारी दिए । बँदेलको समूहले मानिसलाई समेत आक्रमण गरेर घाइते समेत बनाउने भएकाले स्थानीय त्रसित भएका छन् ।