काठमाडौं – राष्टपति बिद्यादेवी भण्डारीबाट सपथ लिएपछि शुक्रबार दिउँसो १ बजे नवनियुक्त सामान्य प्रशासनमन्त्री केशवकुमार बुढाथोकी पदभार ग्रहण गर्न सिंहदरवार पुगे । पदभार ग्रहण गरिसकेपछि मन्त्री बुढाथोकीले कर्मचारीलाई निर्देशन दिँदै भने ,‘मेरो मुहार हेर्न तछाड मछाड गर्दै म कहाँ नआउनु, आवश्यक परयो भने म नै तपाईहरुको मुहार हेरौला ।’
मन्त्री बुढाथोकी पहिलो पटक मन्त्री बनेका छन् । पहिलो दिनमै उनले कर्मचारीलाई हौस्याउने र धम्क्याउने दुवै काम गर्न भ्याए । ‘सचिवज्यू दुर दराजमा बर्षाैदेखि काम गरिरहेका कर्मचारीको मलाई सुचि दिनुहोस्,’ उनले भने ‘बारम्वार विदेश जाने कर्मचारीको विवरण पनि दिन नभुल्नु होला ।’
मन्त्रीज्यूको पहिलो निर्देशन सुनेर सविचले टाउको हल्लाए । हुनत सविच टंकमणि शर्माले दर्जनौ मन्त्रीहरुका दर्जनौ निर्देशन सुनि सकेका होलान । तर पहिलो मन्त्रीको पहिलो निर्देशनमा टाउको मात्र हल्लाए । मन्त्री बुढाथोकीले आजसम्म विदेश भ्रमण नगएका र दुर्गम ठाउँमा बसेर बर्षाै काम गरेका कर्मचारीलाई आफुले न्याय गर्ने बताएपछि सिंहदरवारका कर्मचारी चुपचाप निर्देशन सुनिरहे ।
मन्त्री बुढाथोकी यतिमै चुप लागेनन् । उनले राजनीतिक आवरण बोकेका कर्मचारीलाई आफु कहाँ नआउन निर्देशन पनि दिए । ‘म राजनीतिक ब्यक्ति हुँ तर राजनीतिक आस्थाका आधारमा कर्मचारीलाई काखा र पाखा गर्दिन’, उनले भने । सवै कर्मचारीलाई सामान ब्यवहार गर्ने र आफुलाई पनि दलको नेताका रुपमा मात्र नबुझन आग्रह गरे ।
- एस काठमाडौँ
