‘जनताका मुद्धा बोक्ने हो, गलत गर्नेलाई अक्षरले ठोक्ने हो’ भन्ने नारा बोकेर आर्थिक क्षेत्रमा भएका विकृतिहरुलाई उजागर गरी केहि हदसम्म भएपनि परिवर्तनको साक्षी बन्ने उद्देश्यका साथ २०७३ साल साउन १ गते बाट औपचारिक रुपमा सुरु भएको अर्थ सरोकार डटकमको यात्राले आज पाचौं बर्ष पार गरी छैटौं बर्षमा पाइला टेकेको छ । यो अवधिमा यति धेरै दर्शक, स्रोता र पाठकको माया पाउँदा हामीलाई थप जिम्मेवारीले थिचेको महसुस भएको छ । पाचौँ बर्ष मनाउँदै गर्दा यो खुसीको पलमा हामी, हामीलाई माया गर्ने सबैमा आभार प्रकट गर्दछौं । सबैको मायाले अर्थ सरोकार डटकमले पाएको यो उचाईंको खुसी सबैसँग साट्न चाहान्छौँ । तपाईं पाठककै अगाध मायाका कारण आज अर्थ सरोकार डटकम आर्थिक क्षेत्रको अग्रणी अनलाइन पत्रिका भएकोमा हामी गर्व गर्दछौँ ।
सुरुवातीका दिन सार्है कठिन थिए । तर कठिनताका बीच पनि हामी रति विचलित भएनौँ । निरन्तर लेखिरह्यौं जनताका मुद्धासँग जोडिएका भित्री तथ्यहरु, खोतलीरह्यौं बिकृतिका भ्वाङहरु, उजागर गरिरह्यौं बर्षौंदेखि दबाईएका अन्तरकथाहरु, सुदूरपूर्वदेखि सुदूरपश्चिमसम्म पुगेर सुन्यौँ पीडीतका पीडा, र आवाज उठायौँ माफियाहरुका विरुद्ध । जति, जति कठिन हुँदै गए दिनहरु, त्यति नै बढी खटेर र खपेर अगाडी बढीरह्यौं । किनकि हामीलाई भत्काउनुथियो अनियमितताको जालो, भन्नु थियो जनतालाई माफियाहरुले गरेको दादागिरीको कथा, बुझाउनुथियो सबैलाई देश लुट्नेहरुको असलियत र प्रमाणित गर्नु थियो हामीलाई ‘सत्य एकदिन सत्य सावित हुनैपर्छ ।’ र त लागिरह्यौं हामी निरन्तर खोजीमा ।
आज सुरुवातीका दिनदेखि पाचौँ बर्ष पूरा गर्दासम्म हामीले के गर्यौं त भन्ने प्रश्न महत्वपूर्ण छ । हो, हामीले जति गर्यौं हामी त्यतिमा सन्तुष्ट छैनौं । तर जति गर्यौं त्यसमा गर्व भने जरुर गर्छौं । हामीले आर्थिक पत्रकारितामा केहि फरकपन दिन खोजेका थियौं । र त्यसमा हामी केहि हदसम्म सफल भएका छौँ । आज कसैले अनियमितता गर्दा, कसैले कसैलाई दु:ख दिंदा, कसैले गलत गर्दा पीडीतले अर्थ सरोकार खोजिरहेका छन् भन्ने सुन्दा हामी सार्है गौरवान्वित हुन्छौँ । डे वानदेखि गलतलाई गलत भन्न कतै नचुक्ने र यस मामलामा कसैसँग नझुक्ने हाम्रो चट्टानी अडान आज पनि यथावत छ ।
आज पूराना दस्तावेजहरु हेर्दैगर्दा अर्थ सरोकार सबैभन्दा बढी डकुमेन्टेड न्युजको अभूतपूर्व गोदाम बनेको देख्दा हामी जति खुसी छौं, पाठकको यस्तै विश्वास टिकाइराख्ने चुनौतीबारे चिन्तित पनि छौं । र हामी आज पनि यहि प्रतिबद्धता दोहोर्याउँछौँ- जहाँ गलत हुन्छ, त्यहाँ अर्थ सरोकारले ‘इफ’ वा ‘बट’ हेर्दैन । जे देख्छ, त्यहि लेख्छ ।
संचारको सहजपानासँगै हेर्ने न्युजको प्रभाव झनै बढेको छ । दर्शकको यहि आवश्यकतालाई बोध गर्दै हामीले सुरुवातीका दिनदेखि नै ‘अर्थ सरोकार’ टेलिभिजन कार्यक्रम उत्पादन र प्रशारण गर्दै आएका थियौं । र तपाईंकै सुभेक्षाको परिणाम- हामी आज टेलिभिजनमा प्रशारण हुने आर्थिक टेलिभिजन कार्यक्रममध्ये सबैभन्दा बढी हेरिने कार्यक्रम पनि हाम्रै टिमले उत्पादन गरेको ‘अर्थ सरोकार’ हो भन्दा गौरवान्वित छौँ । अर्थ सरोकार डटकमले तयार गरेका ‘मार्केट टक, काकासँग सेयरका कुरा, बीमा बहस, लगायतका कार्यक्रमहरु सर्वाधिक हेरिने भिडियो कार्यक्रम बन्न सफल बनेको छ भन्ने तथ्य सुनाउँन पाउँदा हामी निकै खुसी छौं । यो असीम मायाका लागि हामी सदैब तपाईंहरु समक्ष ऋणी छौं।
शहरको खाल्डो छोडेर उकाली लाग्दै गर्दा थाहा हुन्छ, सुन्ने समाचारको महत्व । र त अर्थ सरोकार डटकमले अर्थ सरोकार रेडियो कार्यक्रम उत्पादन गरेर समाचार सुन्नेहरुका लागि खोजमूलक समाचार प्रकाशन गरिरहेको छ । अर्थ सरोकार डटकमले तयार गरेको रेडियो कार्यक्रम आज देशका डेढ सय बढी रेडियोहरुबाट प्रशारण हुन्छ । तपाईं स्रोताकै अगाध मायाका कारण अर्थ सरोकार रेडियो कार्यक्रम देशकै सबैभन्दा बढी प्रशारण पहुँच भएको र सबैभन्दा बढी सुनिने रेडियो कार्यक्रम बन्न सफल भएको सम्पूर्ण श्रेय तपाईंहरुलाई नै दिन चाहान्छौं ।
अर्थ सरोकार डटकम, अर्थ सरोकार टेलिभिजन कार्यक्रम, अर्थ सरोकार रेडियो कार्यक्रमको सफलतासँगै हामी अर्थ सरोकार खोज पत्रिकासमेत लिएर तपाईं पाठकमाझ आएका थियौं । कोरोना कहरले हाम्रो प्रिन्ट संस्करणको यात्रामा अल्पविराम लगाईदिएको थियो । तर आजबाट नै हामीले हाम्रो प्रिन्ट संस्करणलाई पनि निरन्तरता दिनेगरी अगाडी बढेका छौं । पूरै ६४ पानाको पत्रिकामा एउटैमात्र विषय उजागर गर्ने हाम्रो फरक प्रयास छ । पत्रिकाको २ अंकमा हामीले गरेको अभ्यास धेरैले मन पराइदिनु पनि भएको छ । आशा छ हाम्रो यो इमान्दार प्रयासलाई पाठकहरुले थप मन पराइदिनुहुनेछ ।
हामी यो तथ्य सुनाउँदा सार्है खुसी छौं कि हामी सबैभन्दा बढी हेरिने, सुनिने र पढिने आर्थिक अनलाइन सञ्चारमाध्यम हौँ । सामाजिक संजालमा आज संचारमाध्यमसँग जोडिएका हरेकजसो पाठक, दर्शक र स्रोताहरु जोडिनुभएको छ । सामाजिक सञ्जाल, समाचार पढ्ने सञ्जालमात्र होइन, परिवर्तनको बल भएको सञ्जाल पनि हो । र त फेसबुकमा सबैभन्दा बढी फलोअर्स भएको आर्थिक मिडिया अर्थ सरोकार नै हो भन्दा हामीलाई हामी बलियो बन्दै गएको महसुस हुन्छ । युट्युबमा सबै भन्दा बढी सब्स्क्राईबर भएको आर्थिक मिडिया पनि अर्थ सरोकार नै हो भन्दा हामी धेरै दर्शकमाझ पुगिरहेका छौं भन्ने तथ्यले हामीलाई थप जिम्मेवार बनाईरहेको छ । अझ संचारको पछिल्लो अभ्यास टिकटकमा त हामी दर्ता भएका अनलाइनहरुमध्येकै सबैभन्दा बढी फलोअर भएको संचारमाध्यम हौँ भन्दा हामी युवाहरुमाझ पनि सार्है प्रिय बनिरहेका छौं भन्ने तथ्य बुझिरहेका छौं ।
पाचौँ बर्षमा प्रवेश गर्दै गर्दा हामीले विभिन्न खाले संचार-अभ्यास पनि गर्यौं । कतिमा सफल भयौँ, कतिमा भएनौँ होला । तर हामीले सुरु गरेको रेडियो अभियान, टेलिभिजन अभियान, सेयर बजार सचेतना अभियान र गलत गर्नेलाई ‘ठोक्ने’ अभियानमा तपाईंहरुको जति माया पाएका छौं, हामीलाई त्यसले उर्जा दिएको भने पक्कै छ । र त हामी आज पनि अविराम, अविरल, खास आर्थिक समाचारको खोजी यात्रामा छौं ।
गर्नु धेरै छ अझै पनि । र त हामी टिम विस्तार गर्दैछौँ । प्रदेशमा ब्युरो कार्यालय नै राखेर संचालन हुने हामी पहिलो आर्थिक अनलाइन संचारमाध्यम हौँ । र आजैबाट पनि हामीले हाम्रो टिमलाई थप विस्तारित बनाएका छौं । आजकै दिनबाट हामीले अर्थ सरोकारको प्रदेश नम्बर १ ब्युरो संचालनमा ल्याएका छौं । छिट्टै नै लुम्बिनी प्रदेशमा पनि हाम्रो ब्युरो कार्यालय संचालन हुँदैछ । प्रविधिको बदलिँदो स्वरूपलाई आत्मसाथ गर्दै हामीले काठमाडौँस्थित कार्यलयमा उच्च प्रविधिको स्टुडियो तयार गर्दैछौँ । रेडियो, टेलिभिजन, अनलाइन र प्रिन्ट संस्करण गरी सबै माध्यमबाट हामी बलियो आर्थिक संचारमाध्यम बन्ने निरन्तर प्रयासमा छौं ।
आजको बार्षिकोत्सव सफलताको उत्सवमात्र होइन, यो सफलता दिलाउने सबैलाई धन्यवाद दिने अवसर पनि हो । र त हामी हामीसँग जोडिनुभएका सबैलाई हामी पाको हुँदै गएको खुसी साट्न चाहान्छौं । अर्थ सरोकारको यो ५ बर्षे यात्रामा विभिन्न समय खण्डमा हाम्रा सहयात्री बन्नुभएका सबै कर्मचारी साथीहरुलाई धन्यवाद भन्न चाहन्छौं । यो अविरल यात्रामा जो-जो मिसिनुभयो, सबैले केहि न केहि दिएरै जानुभएको छ । र त आज अर्थ सरोकार आजको ‘अर्थ सरोकार’ बन्न सफल भएको छ । यो ‘जनताको घर’ मा महत्वपूर्ण इँटा थपिदिनुहुने पूर्वसहकर्मीहरुको योगदानलाई हामी सदैब उच्च सम्मान गर्दछौं ।
हामीलाई यसरी नै माया गरिरहनुहोला । अर्थ सरोकार हेर्दै, पढ्दै र सुन्दै रहनुहोला । तपाईंको विश्वास मर्न दिने छैनौँ । बस् !
सबैलाई धन्यवाद !! सबैलाई बधाई !!
सुरज प्याकुरेल
सम्पादक / सञ्चालक
अर्थ सरोकार डटकम
