काठमाडौं । सनराइज बैंकले कार्डलेस भुक्तानी सेवाको सुरुवात गरेको छ । बैंकले कार्डको प्रयोग बिना नै एटीएमबाट रकम झिक्न सक्ने गरी नयाँ सेवाको सुरुवात गरेको हो । बैंकको यो सेवा अन्तर्गत ग्राहकहरुले मोबाइल बैंकिङको प्रयोग गरी कार्डलेस विथड्रअल अप्सनमा गई आफूले भुक्तानी गर्न चाहेको रकम हाली सब्मिट गर्नुपर्नेछ ।
त्यसपछि ग्राहकको सम्बन्धित मोबाइल नम्बरमा ओटीपी कोड एसएमएस मार्फत आउनेछ । बैंकको एटीएममा गई कार्डलेस विथड्रअल अप्सन रोजी एसएमएसमा आएको ओटीपी कोडको प्रयोग गरी सजिलै कार्ड बिना नै रकम झिक्न सक्नेछन् । ग्राहकहरुले ओटीपी कोड भने गोप्य र सुरक्षित राख्नुपर्नेछ । यो सुविधा ग्राहकहरुले बैंकको देशभरी रहेको १६१ वटा एटीएम मार्फत लिन सक्नेछन् ।
