
एसिडले उनको ओठमुनि र बायाँतर्फको गालामा घाउ भएको छ । कपनको ज्योतिनगरस्थित घर फर्कने क्रममा एकान्तस्थलमा आफूमाथि एसिडले आक्रमण भएको कार्कीले बताएकी छन् । घाइते अवस्थामा दौडँदै उनी घर पुगेकी थिइन् । परिवारले उपचारका लागि उनलाई अस्पताल पुर्याएका हुन् ।
घरबाट करिब तीनसय मिटरको दूरीमा रहेको साथीको कोठाबाट फर्कने क्रममा उनीमाथि एसिड आक्रमण भएको थियो । आक्रमणअघि उनले साथीहरुसँग गत माघमा वसन्तपुरमा भएको एसिडकाण्डबारे पनि कुरा गरेको अनुसन्धानमा खुलेको छ । एसिडबाट घाइते भएका संगीता थापा र सीमा वस्नेतका बारेमा उनले साथीलाई सोधेकी थिइन् । साथै एसिड किन्न पाइने ठाउँको बारेमा पनि कुरा भएको प्रहरीले जनाएको छ । त्यही कारण घटना रहस्यमय भएको हो । उनी अनुहारमा घाउ भएकाले पहिलेदेखि नै मास्क लगाएर हिँड्ने गरको प्रहरीले जनाएको आजको दृष्टि साप्ताहिकमा खबर छ ।