">
काठमाडौँ – प्रमुख प्रतिपक्षी दल नेकपा माओवादीले स्थानीय तहको संख्या बढाउने प्रस्ताव फिर्ताको माग गर्दै संसद बैठक अवरुद्ध गरेको छ ।
स्थानीय विकास मन्त्री कमल थापाले जवाफ दिए पनि एमालेलाई चित्त नबुझेका कारणसंसद बैठक अवरुद्ध पारेको छ । यसअघि मंगलबारको बैठक पनि एमालेको अवरोधका कारण स्थगित भएको थियो । स्थानीय तहको संख्या थप्नका लागि सरकारले परिपत्र गरेको भन्दै उनीहरुले उठेर विरोध जनाएका थिए। साथै सरकारले जवाफ दिनुपर्ने मागसमेत गरेका थिए ।
एमालेकै मागबमोजिम बुधबारको बैठकको सुरुमै उपप्रम थापाले जवाफ दिए । उनले सम्बन्धित जिल्लास्थित प्राविधिकहरुकै सिफारिसममा कानुनसम्बत ढंगले स्थानीय तहको संख्या र सीमा पुनरवलोकन गर्न लागिएको बताए । मधेसी मोर्चा आन्दोलनमा छँदा सम्पूर्ण देशबासीले पाएको दुःखको स्मरण गर्दै उनले यिनै माग सम्बोधन गर्दा मधेसकेन्द्रित दलहरुले चुनावमा भाग लिने अवस्था आएको बताए । स्थानीय तह पुनःसंरचना आयोगले समेत ती ११ जिल्लामा सम्पूर्ण प्रक्रिया र्पुयाएर स्थानीय तह सिफारिस गर्न नसकेको स्वीकारीसकेको अवस्थामा पुनरावलोकन गर्नु कानुन विपरीत नहुने उनले बताए ।
जिल्ला प्राविधिक समितिले गरेको सिफारिसलाई समेत सरकारले सिधै कार्यान्वयन गर्ने नभई संसदमा रहेका दलहरुसँगको सुझावका आधारमा निर्णयमा पुगिने जानकारी गराउँदै उपप्रम थापाले आशंका नगर्न आग्रह गरे । उपप्रम थापाले जवाफ दिएपछि संसद कार्यसूचीअनुसार अघि बढाउन खोज्दा एमाले सांसदहरुले उठेर विरोध जनाएका थिए । त्यसपछि सभामुख ओनसरी घर्तीले एमालेका प्रमुख सचेतक भानुभक्त ढकाललाई बोल्न समय दिइन्। ढकालले सरकारले पूर्वाग्राही र गलत प्रक्रियाबाट ११ जिल्लामा स्थानीय तह थप्न खोजेको भन्दै विरोध गरे। तराईमा अरु पनि जिल्लाहरु रहेको भन्दै उनले के आधारमा ११ जिल्ला चयन गरिएको हो ? भन्ने प्रश्न गरे ।
११ जिल्लामा एउटा मापदण्ड र तराईकै अन्य जिल्लामा अर्को मापदण्ड बनाउनु नै गलत भएको उनको जिकिर थियो । त्यसपछि पनि एमाले सांसदहरुको अवरोध जारी रहेपछि सभामुख घर्तीले बैठक ३ बजे सम्मका लागि स्थगित गरेकी हुन् । – काठमाडौँ टुडे
