- अर्थ सरोकार सम्बाददाता
काठमाडौं । आज बिहीबार असोज १ गतेदेखि मध्यम र लामो रुटका बस सञ्चालनका लागि तयारी भइसकेको यातायात व्यवसायीले बताएका छन् । व्यवसायीले झन्डै ६ महिनादेखि थन्किएका सवारीसाधन सञ्चालनमा ल्याउन थालेका हुन् ।
मन्त्रिपरिषद्को सोमवार बसेको बैठकले स्वास्थ्य सुरक्षाको मापदण्ड पालना गर्दै लामो दूरीका सवारीसाधन सञ्चालन गर्न दिने निर्णय गरेसँगै आजबाट यातायात सञ्चालनमा आएका हुन् । साबिकको भाडा दरमा ५० प्रतिशतसम्म बढी भाडा लिन पाउने र एकपंक्तिमा रहेको सिटमा एकजनामात्रै यात्रु राख्न पाइने निर्णय सरकारले गरेको छ । साथै यात्रु तथा सार्वजनिक गाडीका कर्मचारीले अनिवार्य रूपमा मास्क तथा सेनिटाइजरको प्रयोग गर्नुपर्ने छ ।
स्वास्थ्य सावधानीका उपाय पालना गरे रनगरेको पत्ता लगाउन ठाउँ–ठाउँमा चेकिङको व्यवस्था मिलाइएको छ । यदि पालना नगरेको पाइए कारबाही गर्ने चेतावनी सरकारले दिएको छ ।
