• अर्थ सरोकार सम्बाददाता

काठमाडौं । नेपालको अत्यन्त रुचाइएको रम ब्राण्डले नेपालको पवित्र हिमालयहरुको संरक्षण र सुरक्षार्थ विश्वकै बृहत्तर हिमालय सफाई अभियानमा आफ्नो संलग्नता जनाएको छ । खुकुरी रमका उत्पादक द नेपाल डिस्टिलरिज प्रा.लि.ले नेपाली सेनाको अगुवाइमा सम्पन्न हुन लागेको ऐतिहासिक स्वच्छ हिमालय कार्यक्रम २०२१ मा आफ्नो साझेदारीको उद्घोष गरेको छ । खुकुरी रम र नेपाली सेनाबीच विश्वव्यापी रुपमा नेपालको पहिचान बनाइराख्न सधैं विशेष सम्बन्ध रहँदै आएको छ ।

उक्त कार्यक्रमले ल्होत्से, मकालु, धवलागिरी, पुमोरि, अमादब्लम र सबैभन्दा महत्वपूर्ण विश्वकै सर्वोच्च शिखर सगरमाथाको आधार शिविरहरु र त्यसको सेरोफेरोहरुको सरसफाई गर्ने लक्ष्य राखेको छ । यस अभियानको थालनी ११ अप्रिल २०२१ बाट भएर ५ जुन, २०२१-विश्व वातावरण दिवसको दिनसम्म कायम रही सोही दिन समापन गरिन भएको छ । यो बृहत्तर प्रयासले सबै ६ वटा हिमालयहरुमा फ्याँकिएका करिब ७०,००० केजी तौल बराबरका उपयोगविहीन उपकरणहरु, खाद्यान्न सामग्रीका भाँडाहरु, पालहरु, तथा क्यानहरुका फोहरहरु संकलन गर्ने र त्यसलाई काठमाडौंमा पुर्याउने लक्ष्य राखेको छ । जहाँ फोहरहरु वर्गिकृत गरिनेछ र सोही अनुरुप व्यवस्थित गरिने भएको छ ।