• सुदर्शन श्रेष्ठ/अर्थ सरोकार सुदूरपश्चिम ब्युरो

धनगढी । मदिरा सेवन गर्दै होटल संचालिकालाई धम्की दिएका कञ्चनपुरको कृष्णपुर नगरपालिकाका नगरप्रमुख कर्ण बहादुर हमालले बदनाम हुन थालेपछि समाचार हटाउनका लागि दबाब दिन थालेका छन् ।

सोहि दिन नगरप्रमुख हमालसँगै गौरब होटल पुगेका नेचुरल होटलका सञ्चालक रामप्रसाद भट्टराईले समाचार र फेसबुक स्टाटस हटाउनका लागि पिडितलाई दबाद दिएका हुन् । उनले होटल संचालिकाकी छोरी कृतिमा गिरीलाई फोन गर्दै समाचार तथा स्टाटस हटाउनका लागि दबाब दिएका हुन् ।

कञ्चनपुरको कृष्णपुर नगरपालिकाका नगरप्रमुख कर्ण बहादुर हमालले रातिको समयमा रक्सी माग्दै एक होटल संचालकलाई धम्की दिएका थिए । नगरप्रमुख हमालले राति बन्द भैसकेको गोदावरीको गौरब होटलमा दादागिरि शैलीमा आफूहरुलाई रक्सी चाहिएको भन्दै दबाव दिँदै होटलका संचालक विष्णुदेव गिरिलाई धम्की दिएका थिए ।

नगरप्रमुख हमाल सहितका ४ जनाको समुह रातिको समयमा सरकारी गाडीमा आएर आफ्नो बन्द रहेको होटललाई खुलाएर रक्सी र कोठा चाहियो भन्दै बारम्बार दवाव दिएको होटलका संचालक गिरिकी छोरी कृतिमा गिरिले बताएकी छिन् । राति १० बजे भएकाले आफूहको होटल बन्द भैसकेको र निषेधाज्ञामा रक्सी पनि नभएको बताएपछि नगरप्रमुख हमालले अश्लिल शब्द प्रयोग गर्दै गाली गलौच गर्नुका साथै धम्की दिएका थिए ।