- अर्थ सरोकार सम्बाददाता
काठमाडौँ । प्रहरीले ‘क्यानडा पठाइदिन्छु’ भन्दै १७ लाख ठगी गरेको आरोपमा एक जनालाई पक्राउ गरेको छ । काभ्रे पाँचखाल नगरपालिका वडा नम्बर ७ घर भई काठमाडौंको नयाँ बानेश्वर बस्ने २१ वर्षीय प्रजिन अधिकारीलाई महानगरीय अपराध महाशाखाको टोलीले शुक्रबार उक्त आरोपमा पक्राउ गरेको हो ।
अधिकारीले सर्लाही लालबन्दी नगरपालिका रानीगञ्ज बस्ने ३० वर्षीया यमुना बस्नेतलाई वर्किङ भिसामा क्यानडा पठाएर राम्रो काममा लगाइदिने आश्वासन दिएर १७ लाख रूपैयाँ लिएका थिए । तर पछि उनी सम्पर्कविहीन भई फरार भएपछि महाशाखामा गत वैशाख १३ गते जाहेरी परेको थियो।
सोही जाहेरीको आधारमा प्रहरीले बनेपा नगरपालिका वडा नम्बर २ दाहाल गाउँबाट प्रजिन अधिकारीलाई पक्राउ गरेको महाशाखाले जनाएको छ । अधिकारीले विभिन्न व्यक्तिहरूलाई यसरी नै करिब एक करोड ५० लाखभन्दा बढी रकम ठगेको पाइएको छ । उनीमाथि थप अनुसन्धान गर्न महाशाखाले महानगरीय प्रहरी परिसर, काठमाडौं पठाइएको छ।
