- सुदर्शन श्रेष्ठ/अर्थ सरोकार सुदूरपश्चिम ब्युरो
धनगढी । धनगढीमा सार टीमले ईलेक्ट्रिक कार निर्माण गरेको छ । एक्सिस विद्याश्रमको कक्षा १० मा अध्ययनरत ४ जना विद्यार्थीको सार टीमले ‘अल्फा’ नामक कार निर्माण गरेको हो ।
१६ वर्ष भन्दा मुनिका ४ जना किशोर ऋषिकेश थापा, रोहीत ऐर, आदित्य जोशी र सक्षम रेग्मीले विद्युतबाट सञ्चालन हुने कार निर्माण गरेका हुन् । एक लाख ५० हजारको लगानीमा विभिन्न सामग्रीहरु जुटाएर आफ्नै परिश्रमबाट गाडी निर्माण गरेको ऋषिकेश थापाले बताए । ‘हामी ४ जनाको टिमले पहिले बाटै केहि नयाँ गर्ने सोच बनाएका थियौँ’, उनले भने, ‘लकडाउनमा फरक गर्ने सोचसँगै ईलेक्ट्रिक कार निर्माण गरेका हौँ ।’ त्यस्तै उनले आफुहरुको उक्त प्रयासमा परिवार र विद्यालयको ठूलो सहयोग रहेको बताएका छन् ।
निर्माण गरिएको सार अल्फा कार नेपालको भौगोलिकतालाई सुहाउँदो भएको अर्का विद्यार्थि सक्षम रेग्मीले बताए । ‘नेपालको परिपेक्षमा प्राय अफरोड गाडीहरु मन पराईने भएकोले आफुहरुले तयार गरिएको छ’, रेग्मीले भने, ‘सहजताका लागि इलेक्ट्रिक कारमा सस्पेन्सन सिस्टम पनि राखेका छौँ ।’ लगानी र गाडीका लागि चाहिले पार्टसको अभावका कारण कवाडबाट सामाग्री ल्याएर त्यसैलाई प्रयोग गरेको उनले बताएका छन् ।
४ जना किशोरले आफ्नै हातबाट निर्माण गरेको अल्फा नामक कारलाई आइतबार सार्वजनिक गरिएको छ । अहिले सार्वजनिक गरिएको कारले ७ क्विन्टल बोक्न सक्ने बताइएको छ । अन्य गाडी जस्तै देखिने अल्फा कारलाई पनि बजारमा ल्याउने तयारी सार टीमको छ । सबै निकायबाट सहयोग प्राप्त भए नयाँ सामान पनि उत्पादन गर्ने योजना सार टीमले बनाएको छ ।
