- अर्थ सरोकार सुदूरपश्चिम ब्युरो
धनगढी । अमेरिकी सहयोग नियोग मिलिनियम च्यालेन्ज कर्पोरेशन (एमसीसी) को विरोधमा बुधबार देशभर बन्दसहितको आन्दोलन गरिएको छ । संसदमा एमसीसी टेबल गर्ने सरकारको निर्णय लगत्तै विप्लव नेतृत्वको नेकपासँगै ६ दलिय गठबन्दनले नेपाल बन्दको आह्वान गरेका हुन् ।
बन्दको आंशिक प्रभाव सुदूरपश्चिमको अस्थायी राजधानि धनगढीमा समेत देखिएको छ । बन्दको आह्वानसँगै बैंक तथा वित्तिय संस्था, सरकारी कार्यालय, शैक्षिक संस्था तथा यातायात क्षेत्र लगाएत व्यापार व्यवसाय पुर्ण रुपमा बन्द गरिएका छन् । बजार बन्द हुँदा धनगढीमा आर्थिक कारोबार पनि घटेको छ ।
व्यापार सञ्चालन गर्न नपाउँदा एक दिनमै लाखौँको घाटा बेहोर्नुपर्ने धनगढीका एक व्यापारी हरिकृष्ण न्यौपानेले बताए । ‘हाम्रो दैनिकीको आधार नै व्यापार हो’, उनले भने, ‘यसरी बन्द हुँदा घाटा त बेहोर्नु नै पर्छ सँगसँगै व्यापारको लय अझै पछाडी धकेलिन्छ ।’
बन्दसँगै बैंक तथा वित्तिय संस्था, व्यापार तथा विभिन्न आर्थिक क्षेत्रमा कारोबार शुन्य बनेको छ । दैनिक करोडौँको आर्थिक कारोबार हुने धनगढी बजार बन्दकै कारण बुधबार प्राय ठप्प छ ।
