काठमाडौं । युनाइटेड मोदी हाइड्रोपावरको साधारणसभा फागुन २६ गते हुने भएको छ । सभा कम्पनीको रजिष्टर्ड कार्यालय कमलादी काठमाडौंमा बिहान ११ बजे जुम माध्यमबाट सुरु हुने भएको हो ।  कम्पनीले यो वर्ष लगानीकर्ताको हात भने रित्तो बनाउने भएको छ । लाभांश वितरण सम्बन्धी एजेन्डा छैन ।

कम्पनीले सभामा आर्थिक वर्ष २०७७–७८ को वासलात, नाफा–नोक्सान र नगद प्रवाहमाथि छलफल गर्नेछ भने कम्पनीको सर्वसाधारण सेयरधनीको तर्फबाट प्रतिनिधित्व गर्ने २ जना सञ्चालकको निर्वाचन गर्ने प्रस्ताव पनि सभामा पेश हुँदैछ ।

आर्थिक वर्ष २०७८–७९ का लागि लेखापरीक्षक नियुक्त गरी पारिश्रमिक निर्धारण गर्नेलगायतका एजेन्डा पनि राखिएको छ । यस्तै, कम्पनीको प्रबन्धपत्र र नियमावलीमा संशोधन गर्ने एजेन्डा पनि छ । सभाका लागि कम्पनीले फागुन ५ गते बुक क्लोज गरेको छ । फागुन ४ गतेसम्म कायम सेयरधनी सभामा भाग लिन सक्नेछन् ।