- अर्थ सरोकार सुदूरपश्चिम ब्युरो
धनगढी । धनगढीमा वर्षाका कारण थुप्रै पुल तथा कल्भर्टहरु भत्किएका छन् भने केही जिर्ण अवस्थामा छन् । अझ ग्रामिण क्षेत्रमा सम्बन्धित निकायको ध्यान कमै जानेहुँदा यस्ता समस्या वर्षेनी आईपर्ने स्थानीय बताउँछन् । यसैबीच केहीदिन अघि परेको वर्षाका कारण धनगढी उपमहानगरपालिका वडा नम्बर १४ बि गाउँमा कल्भर्ट भत्कायो । दैनिक नागरिकको आवतजावत भईरहने सडकमै कल्भर्ट भत्किएपछि जोखिम झनै बढेको स्थानीयले बताएका छन् ।
यसो त वडाभित्र हुने हरेक गतिविधिको निगरानी प्रत्यक्ष वडा कार्यालय र वडा प्रतिनिधिले गर्नुपर्छ तर सो समस्याका बारेमा वडा कार्यालयको चासो नगएको स्थानीयले बताएका छन् । ‘हुनत यो वडाको वडा अध्यक्ष यही गाउँको हुनुहुनछ तर खोई किन उहाँको खासै चासो देखिएन । यही बाटो भएर विद्यार्थी हिंड्छन्, दैनिक सयौँ नागरिक आवतजावत गर्छन् । कसैलाई केही भए जिम्मेवार को हुने ?’ अर्थ सरोकारसँग कुराकानी गर्दै एक स्थानीयले भने, – ‘जानकारी नभएको हो भनौँ भने आफै हिंड्ने बाटोको बारेमा कसले जानकारी दिने ? वडाको अवस्थाका बारेमा बुझ्नका लागि जनप्रतिनीधिले सक्रियता अलि बढाउनुपर्छ ।’
सो कल्भर्टका विषयमा चासो नदिएको र जोखिम बढेको भन्दै सामाजिक सञ्जाल तथा समाचार माध्यममा सामाचार प्रकाशित भएपछि नगरपालिकाको भने ध्यान गएको छ । बुधबार सो कल्भर्टको धनगढी उपमहानगरपालिकाकी उपप्रमुख कन्दकला कुमारी रानाले अनुगमन गरेकी छिन् । अनुगमन गर्दै उपप्रमुख रानाले सो कल्भर्टलाई तत्काल निर्माण गरी जोखिम कम गर्ने प्रतिबद्धता गरेकी छिन् । ‘यो कल्भर्टले निम्त्याउन सक्ने जोखिम डरलाग्दो छ । अझ दैनिक नागरिकको आवतजावत भईरहने सडक हुनाले पनि जोखिम दोब्बर बढेको छ’, अर्थ सरोकारसँग कुराकानी गर्दै उपप्रमुख रानाले भनिन् –‘तत्कालै यो कल्भर्ट निर्माणका लागि पहल गर्छौं । ४ वटा कल्भर्ट ल्याएर तत्कालका लागि जोखिम न्युनिकरण गर्छौं । भविष्यमा स्तरीय कल्भर्ट निर्माण गर्छौं ।’
बुधबार उपप्रमुख राना, वडा नम्बर १४ का अध्यक्ष मान बहादुर विष्ट र सदस्य लगाएतको टिमले अनुगमन गरेको थियो ।
