- अर्थ सरोकार सुदूरपश्चिम ब्युरो
बैतडी । बैतडीका पुर्चौंडी बहुमुखी क्याम्पसका प्रमुख राजेन्द्रसिंह नेगीलाई बलात्कारको आरोपमा कारागार चलान भएको छ । नेगीले ज्यालामजदुरी गर्दै आएकी एक महिलालाई बलात्कार गरेको आरोप लागेको हो ।
गत असार २० गते पानी माग्ने निहुँमा क्याम्पस प्रमुख नेगीले महिलामाथि बलात्कार गरेको आरोप लागेको हो । उक्त महिला कैलाली घर भई बैतडीको पुर्चौंडीमा ज्यालामजदुरी गरी जिविकोपार्जन गर्दै आइरहेकी थिइन् । जिल्ला अदालतले नेगीलाई पुर्पक्षका निमित्त कारागार चलान गर्न आदेश दिएको प्रहरी नायब उपरीक्षक प्रेमबहादुर शाहीले जानकारी दिएका छन् ।
सो बलात्कृत महिलाले आफूमाथि प्रमुख नेगीले जबर्जस्ती करणी गरेको भन्दै दिएको जाहेरीका आधारमा नेगीविरुद्ध इलाका प्रहरी कार्यालय पाटनमा जबर्जस्तीकरणी मुद्दा दर्ता गरिएको थियो । आरोप लागेपछि गत साउन पहिलो साता नेगी आफैँ जिल्ला प्रहरी कार्यालय पुगेका थिए । आरोप लागेपछि क्याम्पस प्रमुख नेगीले यसअघि असार २७ गते पदबाटसमेत राजीनामा दिएका थिए ।
