काठमाडौं । १ खर्ब बढी अमेरिकी डलरका मालिक गौतम अडानी विश्वकै तेस्रो धनी व्यक्ति बनेका छन् । अडानी ग्रुपका संस्थापक समेत रहेका गौतमको मंगलबारसम्म कुल सम्पत्ती १ खर्ब ३७ अर्ब अमेरिकी डलर पुगेको छ । योसँगै अडानी ब्लुमबर्गको सूचीमा तेस्रो स्थानमा छन् । उनी विश्वकै धनीहरुको सूचीमा शीर्ष ३ मा पर्ने एसियाकै पहिलो व्यक्ति बनेका छन् ।

भारतकै सबैभन्दा ठूलो व्यापारिक समूहमध्येको अडानी ग्रुपका मालिक हुन्, अडानी । अडानी कोइलाको कारोबार गर्छन् । कलेज पढ्दादेखि नै ठूलो महत्वकांक्षी भएका अडानीले पढाई छोडेर हिराको कारोबारबाट आफ्नो व्यापारिक साम्राज्यको सुरुवात गरेका थिए । भारतकै धनी व्यक्तिका रुपमा परिचित मुकेश अम्बानीलाई समेत पछि पार्दै अडानीले विश्व धनीको सूचिमा आफ्नो स्थान सुनिश्चित गरेका छन् ।

हाल विश्वकै सर्वाधिक धनीहरुको सूचीको पहिलो नम्बरमा टेस्लाका इलन मस्क रहेका छन् भने दोस्रो स्थानमा अमेजनका जेफ बेजोस रहेका छन् । ब्लुमबर्गको मंगलबारको सूची अनुसार बेजोसको सम्पति १ खर्ब ५३ अर्ब डलर र मस्कको २ खर्ब ५१ अर्ब डलर रहेको छ भने अडानीको सम्पति सन् २०२२ मा मात्रै ६०.९ अर्ब डलरले बढेको छ । यता, अडानी ग्रुपको सेयर भाउ सन् २०२० यता १०००% भन्दा धेरैले बढेको छ । उनी ब्लुमबर्गको सूचीको पहिलो नम्बरमा आउनका लागि मेहेनत गरिरहेका छन् ।