- अर्थ सरोकार सुदूरपश्चिम ब्युरो
कैलाली । धनगढी उपमहानगरपालिकाले भूमिहीन सुकुम्बासी नगारिकलाई लालपुर्जा वितरण गर्ने भएको छ । लामो समयदेखि भूमिहीन तथा सुकुम्बासी जिवन बिताइरहेको धनगढीका नागरिकलाई लालपुर्जा वितरण गर्नका लागि नगरपालिकाले नापी कार्यको थालनी गरेको छ ।
राष्ट्रिय भूमि आयोग र उप-महानगरपालिकाको सहकार्यमा लालपुर्जा वितरण गर्नका लागि तयारी थालिएको छ । बिहीबार धनगढी उपमहानगरपालिकाका मेयर गोपाल हमालले नापी कार्यको शुभारम्भ गरेका छन् । उद्घाटनसँगै वडा नं. १४ स्याउलेबाट नापी कार्यको सुरुवात भएको हो । नापी कार्यको उद्घाटन गर्दै मेयर हमालले भूमिहीन भएर दैनिकी गुजारिरहेका नागरिकले छिट्टै लालपुर्जा पाउने बताएका छन् । ‘आजबाट नापी कार्यको सुरुवात भएको छ । अवस्था र आवश्यकताका आधारमा परिवारको पहिचान गरी नगरपालिकाले लालपुर्जा वितरण गर्छ ।’ मेयर हमालले भने -‘लामो समदेखि चर्किएको भूमिहिन तथा सुकुम्बासीको आन्दोलनलाई यसैपाली नगरपालिकाले सम्बोधन गर्छ । छिट्टै भूमिहीन तथा सुकुम्बासी नागरिक जग्गाको मालिक बन्न पाउनेछन् ।’
यसभन्दा अघि धनगढी उपमहानगरपालिकाले भूमिहीन सुकुम्बासीलाई लालपुर्जा दिने अभियान अन्तर्गत वडा नम्बर ३ बाट नापी कार्यको थालनी गरेको थियो । त्यस्तै बिहीबार नै मेयर हमालले वडा नम्बर २ मा पनि नापी कार्यको शुभारम्भ गरेका छन् । योसँगै अब लालपुर्जा पाउने भएपछि भूमिहीन तथा सुकुम्बासी नागरिक पनि खुसि भएका छन् । ‘अब जग्गाको मालिक बन्ने सपना पुरा हुनेभयो’, वडा नम्बर १४ का एक स्थानीयले भने, ‘हमाल ज्युले हाम्रो समस्यालाई बुझेर नापी कार्य सुरु गर्नुभएको छ । उहाँलाई धेरै–धेरै धन्यवाद ।’
