काठमाडौं । दशैं र तिहारमा मात्रै ३१६ वटा कार्वाहीमा परेका छन् । बजार अनगुमनका क्रममा वाणिज्य, आपूर्ति तथा उपभोक्ता संरक्षण विभागले उपभोक्ताको हित विपरितका सामाग्रीको कारोबार गरेका भन्दै ३१६ वटा व्यापारिक फर्मलाई जरिवाना गरेको हो ।
विभागले एक महिनाको अवधिमा बजार अनुगमनबाट ५१ लाख रुपैयाँ राजस्व संकलन गरेको छ । विभागकाअनुसार यस अवधिमा २७ वटा वस्तु तथा सेवा क्षेत्रमा १४ सय २६ वटा अनुगमन भएको थियो । सबैभन्दा धेरै अनुगमन खाद्य वस्तु क्षेत्रमा भएको थियो ।
यस अवधिमा खाद्यान्नका १४७, लत्ता कपडाका ३० र मार्ट तथा मिनीमार्टका १३ वटा शाखामा अनुगमन भएको थियो । जसमध्ये ४१३ वटा फर्मबाट थप कागजात माग गरिएको र ७२ वटा फर्मको वस्तु नष्ट गरिएको विभागले जनाएको छ ।
अनुगमनका क्रममा उपभोक्ता हित विपरित फेला परेर नष्ट गरिएका वस्तुको बजार मूल्य ३० लाख रुपैयाँ हाराहारी रहेको विभागले जनाएको छ । यस्तै ६१६ वटा फर्म अनुगमनमा क्रममा सामान्य अवस्थामा भेटिएका थिए ।
