काठमाडौं । ग्लोबल आइएमई लघुवित्त वित्तीय संस्थाको नाफा ५८ प्रतिशतले घटेको छ । बैंकले चालु आर्थिक वर्षको पहिलो त्रैमाससम्मको वित्तीय विवरण सार्वजनिक गर्दै समिक्षा अवधिमा २ करोड ६७ लाख ४६ हजार रुपैयाँ नाफा कमाएको जनाएको छ । जुन गतवर्षको तुलनामा ५८.१५ प्रतिशत कम हो ।

ग्लोबल आइएमई लघुवित्तले गत वर्षको यही अवधिमा ६ करोड ३९ लाख ८ हजार रुपैयाँ खुद नाफा कमाएको थियो । चालु आर्थिक वर्षको पहिलो त्रैमासमा लघुवित्तको सञ्चालन नाफापनि ५८ प्रतिशतले घटेर ३ करोड ८३ लाखमा रुपैयाँ कायम भएको छ ।

त्यस्तै समिक्षा अवधिमा संस्थाले ८ अर्ब ४८ करोड १० लाख रुपैयाँ कर्जा विस्तार गरेको छ भने ३ अर्ब ५ करोड ८२ लाख रुपैयाँ निक्षेप संकलन गरेको छ । यता लघुवित्तको वितरण योग्य नाफा १ करोड ४२ लाख रुपैयाँमा कायम हुँदा खुद ब्याज आम्दानी १३.८३ प्रतिशतले घटेर १३ करोड ६८ लाख रुपैयाँमा सीमित भएको छ ।

हाल ग्लोबल आइएमई लघुवित्तको चुक्ता पुँजी ५५ करोड २५ लाख ८९ हजार रुपैयाँ छ । जगेडा कोषमा ५४ करोड ८२ लाख रुपैयाँ जम्मा भएको संस्थाको असोज मसान्तसम्म आइपुग्दा प्रतिसेयर आम्दानी (ईपिएस) ३९ रुपैयाँ ७६ पैसाले घटेर १९ रुपैयाँ ३६ पैसामा झरेको छ । संस्थाको प्रतिसेयर नेटवर्थ १९९ रुपैयाँ २२ पैसा छ । यसको निष्कृय कर्जा अनुपात बढेर २.७३ प्रतिशत पुगेको छ ।