काठमाडौं । एनआईसी एशिया लघुवित्तले चालु आर्थिक वर्षको पहिलो त्रैमाससम्मको वित्तीय विवरण सार्वजनिक गरेको छ । लघुवित्तले सार्वजनिक गरेको वित्तीय विवरण अनुसार संस्थाको खुद नाफा ६८.१८ प्रतिशतले घटेको छ ।
गत आर्थिक वर्षको समिक्षा अवधिमा लघुवित्तको खुद नाफा २० करोड ६७ लाख ५७ हजार थियो । तर, चालु आर्थिक वर्षमा सो नाफा घटेर ६ करोड ५७ लाख ९५ हजार रुपैयाँमा सिमित भएको छ । यसअवधिमा बैंकको खुद ब्याज आम्दानी र सञ्चालन नाफा दुवै घटेकोले एनआईसी एशिया लघुवित्तको खुद नाफा प्रभावित बनेको हो ।
समिक्षा अवधिमा एनआईसी एशिया लघुवित्तको खराब कर्जा र इम्पेयरमेन्ट चार्ज भने बढेको छ । लघुवित्तले सार्वजनिक गरेको वित्तीय विवरणका अनुसार चालु आर्थिक वर्षको पहिलो त्रैमाससम्मा संस्थाको खुद ब्याज आम्दानी ३१.०९ प्रतिशतले घटेर २९ करोड २ लाख ५७ हजार रुपैयाँ कायम भएको छ ।
त्यस्तै संस्थाको सञ्चालन नाफामा पनि ६८.१७ प्रतिशतले गिरावट आएको छ । यता संस्थाको खराब कर्जा २.२६ प्रतिशतले बढेर ३.८१ प्रतिशत पुगेको छ । खराब कर्जा बढेसँगै गत वर्ष ४ करोड ७२ लाख ४५ हजार रुपैयाँ रहेको इम्पेयरमेन्ट चार्ज यो वर्ष ६६ करोड ९१ लाख ९३ हजार रुपैयाँ पुगेको छ । असोज मसान्तसम्म एनआईसी एशिया लघुवित्तको प्रतिसेयर आम्दानी १४ रुपैयाँ ८५ पैसा र प्रतिसेयर नेटवर्थ १५८ रुपैयाँ ७९ पैसा छ ।
