काठमाडौं । प्रधानमन्त्री पुष्पकमल दाहाल (प्रचण्ड)ले मिटरब्याज पीडितका समस्या समाधानका लागि यथाशीघ्र पहल गर्ने बताएका छन् । आफ्नै निवासमा मिटरब्याजी पीडितहरुसँग भेट गर्दै प्रधानमन्त्री प्रचण्डले यस्तो बताएका हुन् ।
गाउँ तथा सहर जताततै मिटरब्याजीका कारण कमजोर आय भएका नागरिक नराम्ररी पासोमा परेको भन्दै शुक्रबार बिहान प्रधानमन्त्री निवास बालुवाटारमा मिटरब्याजी समस्याबाट पीडित किसानसँग प्रधानमन्त्री दाहालले भेट गरेका थिए । पीडित किसानसँगको भेटमा प्रधानमन्त्रीले यस समस्यालाई आफूले समाधान गर्ने प्रतिबद्धता जनाएका छन् ।
‘अघिल्लो सरकारसँग भएको सम्झौता हेर्छौँ’, प्रचण्डले भने, ‘मिटरब्याजी समस्याले हजारौँ किसान पीडित भएका छन्, यसलाई मैले राम्रोसँग बुझेको छु, यसपटक तपाईँहरूको समस्या समाधान गर्ने कुरा मेरो प्राथमिकतामा छ, म समाधान गर्छु ।’
प्रधानमन्त्रीसँग भेटमा किसानका प्रतिनिधिले वर्तमान सरकार किसानको प्रतिनिधि सरकार भएकाले आफूहरूका समस्या समाधान हुने विश्वास व्यक्त गरेको प्रधानमन्त्रीको सचिवालयले जनाएको छ ।
