काठमाडौं । मूल्यवृद्धिको १ वर्ष नपुग्दै डेरी उद्योगहरुले दुधको मूल्य पुनः बढाएका छन् । किसानको बाहना बनाउँदै डेरी उद्योग संघको संरक्षणमा केही डेरी उद्योगीले दुधमा प्रतिलिटर १४ रुपैयाँ मूल्य वृद्धि गरेका हुन् । जबकी राष्ट्रिय दुग्ध विकास ऐन तथा नीतिमा दुई/दुई वर्षमा मात्रै बजारमूल्य समायोजन गर्न पाइने प्रावधान रहेको छ ।
सरकाले यसअघि २०७८ माघ २८ गते दुधको मूल्य ९ देखि १४ रुपैयाँसम्म बढाइसकेको छ । तर, यसपटक डेरी उद्योगीहरुले सरोकारवाला नियकासँग छलफल नै नगरी नियमविपरित आफूखुसी मूल्यवृद्धि गरेका हुन् ।
यता डेरी उद्योग संघका अध्यक्ष राजकुमार दाहालले किसानलाई तिर्नुपर्ने मूल्यमा वृद्धि हुँदा दुधको मूल्य बढेको बताएका छन् । ‘अहिले किसानलाई तिनुपर्ने दुधको मूल्यमा प्रतिलिटर १०/१२ रुपैयाँ बढेको छ’, उनले भने, ‘घाटा खाएर व्यवसाय गर्ने कुरै भएन । किसानले मूल्य बढाएपछि व्यवसायीले पनि आफैँ मूल्य बढाएका हुन् ।’
बढेको मूल्य पुस १६ गतेदेखि बजारमा लागू भएको छ । डेरी उद्योगहरुले आफुखुसी मूल्य बढाउँदा सर्वसाधारण भने मर्कामा परेका छन् ।
