">
काठमाडौं । भारतीय आयल कर्पोरेसन (आईओसी) ले इन्धनको नयाँ मूल्य पठाएको छ । आईओसीको नयाँ मूल्यसूची अनुसार मट्टितेलबाहेकका सम्पूर्ण इन्धनको मूल्यमा वृद्धि भएको नेपाल आयल निगमले जनाएको छ ।
निगमका अनुसार पेट्रोलमा प्रतिलिटर २ रुपैयाँ ७५ पैसा, डिजेलमा २ रुपैयाँ ९५ पैसा, हवाई इन्धनमा ४ रुपैयाँ १३ पैसा र एलपी ग्याँसमा प्रति सिलिण्डर ७८ रुपैयाँ २२ पैसा मूल्य वृद्धि भएको छ । तर, मट्टितेलको मूल्य भने केही घटेर आएको निगमले जनाएको छ ।
हाल एलपी ग्याँसमा ३ सय ५९ रुपैयाँ ५० पैसा प्रति सिलिण्डर घाटा रहेको र दैनिक घाटा ४६.४४ करोड रहेको निगमले जनाएको छ । ‘पेट्रोल, डिजेल, हवाई इन्धन र मट्टितेलमा हुने केही नाफालाई गणना गर्दा समग्रमा निगमलाई आगामी १५ दिनमा अनुमानित ९९ करोड नाफा हुने देखिएको छ ।’ -निगमको सूचनामा उल्लेख गरिएको छ ।
त्यस्तै, निगमले भारतीय आयल कर्पोरेशनलाई ८ जनवरी, २०२३ मा भुक्तानी गर्नुपर्ने रकम, पुरानो बक्यौता एवम् नेपाल सरकारलाई तिर्नुपर्ने ऋणसमेत गरी अझै पनि करिव १८ अर्ब रुपैयाँ तिर्न बाँकी रहेको निगमले जनाएको छ ।
अन्ताराष्ट्रिय बजारमा प्रशोधित पेट्रोलियम पदार्थको मूल्य पुनः घटबढ हुने क्रममा रहेको अवस्थामा पेट्रोलियम पदार्थको आपूर्ति सुचारु राख्न र आईओसीको बक्यौता एवम् नेपाल सरकारद्धारा उपलब्ध गराइएको ऋणको व्यवस्थापन गर्न निमगलाई चुनौती रहेकोले हाललाई पेट्रोलियम पदार्थको खुद्रा बिक्री मूल्य यथावत् राखिएको निगमले जनाएको छ ।
यसो त नयाँ सरकारलाई सहयोग गर्ने भन्दै आयल निगमले तत्काल भाउ नबढाउने रणनीति लिएको बुझिएको छ । प्रचण्ड नेतृत्वको सरकारले पनि तत्काल उपभोक्तालाई असर गर्ने र सरकार विवादमा तानिने निर्णय नगर्न आयल निगमलाई अनौपचारिक निर्देशन दिएको बुझिएको छ ।
