काठमाडौं । पछिल्लो समय सहकारी भाग्ने क्रम बढ्दो छ । दिनहुँजसो सहकारी भागेको खबरले ‘प्यानिक’ बनेका बचतकर्ताहरु रकम झिक्नका लागि अहिले सहकारीमा धाउन थालेका छन् । तर, सबैको गुनासो एउटै छ, ‘सहकारीले पैसा नै दिएन ।’
हुन पनि अहिले राम्रै भनिएका सहकारीहरुले बचतकर्ताको करोडौँ रकम अड्काएका छन् । ‘हामी अरु जस्तो होइनौँ, हाम्रो सहकारीमा समस्या छैन’ भन्नेहरु पनि अहिले घुमाउरो पारामा ‘समस्यामा छौँ’ भन्ने खालका आशय दिन्छन् तर पैसा दिँदैनन् । जसमध्येको एक हो सुमेरु सेभिङ्ग एण्ड क्रेडिट को-अपरेटिभ लिमिटेड ।
सुमेरु सेभिङ्ग एण्ड क्रेडिट को-अपरेटिभको कालिमाटी शाखामा अहिले रकम झिक्नेहरुको भीड छ । दैनिक बचतकर्ताहरु आफूले जम्मा गरेको रकम झिक्न कार्यालयमा पुग्ने गरेका छन् । तर, आफ्नै पैसा पनि सहकारीले फिर्ता नगरेको वितेशबहादुर शाहले बताएका छन् । ‘आफ्नै पैसा माग्दा पनि दिँदैन, कति दिन भईसक्यो धाउन थालेको पैसा नै नदिएर तनाव दिएको छ’, उनले भने, ‘म एक्लैको भएको भए त केही समस्या नै थिएन तर सुमेरुबाट पैसा नपाउने धेरै छन् ।’
‘सुमेरुबाट अहिले मैले लिनुपर्ने एक लाख ३० हजार रुपैयाँ हो । २० लाख डबलमा रोखेको छु, त्यसको समय अझै ४ वर्ष बाँकी छ’, उनले भने, ‘अहिले नै पैसा रोक्न थालिसक्यो, ४ वर्षपछि त के हुने हो ? संस्था नरहने हो कि भन्ने डर लागिसक्यो ।’
शाहका अनुसार सो सहकारीमा ५० हजारदेखि ७० लाखसम्म निक्षेप जम्मा गराएका बचतकर्ताहरु छन् । तर, पटक-पटक आफ्नै रकम झिक्न जाँदा पनि सहकारीले पैसा नै नदिने उनीहरुको गुनासो छ ।
सहकारी भन्छ- ‘फिर्ता गर्नलाई पैसा नै छैन’
यता सहकारीले भने बचतकर्तालाई फिर्ता गर्न पैसा नै नभएको प्रतिक्रिया दिएको छ । सहकारीमा तरलता अभावका कारण बचतकर्तालाई एकमुष्ठ रकम दिन नसकेको सहकारीकी कालिमाटी शाखा प्रबन्धक स्वच्छन्दा मानन्धरले स्वीकारेकी छिन् ।
‘पैसा नै नदिएको वा नदिने भन्ने त होइन, अहिलेलाई सहकारीहरुको जताततै ‘क्यास क्राईसिस’ले गर्दा अफ्ठ्यारो परेको हो’, शाखा प्रबन्धक मानन्धरले भनिन्, ‘हामीले अहिले १०-१० हजार सेलिङ्ग तोकेका छौँ, त्यही अनुसार कारोबार भईरहेको छ ।’
मानन्धरका अनुसार सहकारीमा आफ्नै पैसा झिक्न जानेहरुले पनि दैनिक १० हजार मात्रै रकम पाउँछन् । ‘सहकारीमा देखिएको तरलता अभावको बारेमा ठूला निक्षेपकर्ताहरु कन्भिन्स हुनुहुन्छ, छिट्टै समस्या सामाधान गर्नुस् भन्नुभएको छ’, उनले भनिन्, ‘सहकारीमा ‘क्यास क्राइसिस’ भएरै यसरी कारोबार गरिएको हो ।’
प्रतिक्रिया दिनुहोस्