काठमाडौं । लघुवित्त बैंकर संघका पूर्वअध्यक्ष बसन्त लम्सालले राज्यको उदाशीनताका कारण लघुवित्तकर्मीहरु कमजोर भएको बताएका छन् । अर्थ सरोकार डटकमको साप्ताहिक टेलिभिजन कार्यक्रम ‘बिज एण्ड ब्रेन’मा बोल्दै उनले यस्तो बताएका हुन् ।

पछिल्लो समय लघुवित्त वित्तीय संस्थाविरुद्धको आन्दोलन र लघुवित्तकर्मीमाथि हुने गरेको दुव्र्यवहारका घटनाले राज्यविहीनताको अनुभुति भएको लम्सालको भनाई छ । ‘लघुवित्त वित्तीय संस्था के का लागि जन्मिएको हो ? सुरुवाती दिनमा गाउँगाउँमा वित्तीय पहुँच पुर्याउने र निम्न वर्गका नागरिकमाझ वित्तीय पहुँच पुर्याउने भनेर राज्यले नै पठाएको होइन ? अनि अहिले आएर लघुवित्त भनेका छुट्टै ग्रहबाट आएका हुन् जस्तो व्यवहार किन गर्दैछ राज्य ?’ कार्यक्रममा प्रश्न गर्दै उनले भने, ‘लघुवित्त वित्तीय संस्थाविरुद्ध यतिबिघ्न अराजकता मच्चिदा पनि राज्य मौन छ । राज्यको यही उदाशीनताका कारण हामी लघुवित्तकर्मी कमजोर भएका छौँ ।’

त्यस्तै, उनले लघुवित्तमा वित्तीय संस्थाको सिस्टम बिग्रिनुमा सेयर खेलाडीको हात नरहेको समेत दाबी गरेका छन् । ‘लघुवित्तको सिस्टम सेयर बजारका खेलाडीले नै बिगारेका हुन् भन्ने चाहिँ होइन । म्यानेजमेन्टका सवालमा पनि सेयर खेलाडीको भूमिका त कहाँ हुन्छ र ? होला, कहिँकतै सीईओलाई नाफा गराउनुपर्छ भन्ने हुनसक्छ ।’ उनले भने, ‘लघुवित्त आफैमा सानो संस्था हो । त्यसमा पनि सप्लाई थोरै र नाफा पनि धेरै हुनेहुँदा पनि अधिकांशले लघुवित्तकै सेयर किन्न खोज्ने अवस्था थियो । त्यसमा अब भित्र केहीले चलखेल गरे होलान् तर सेयर खेलाडीकै कारण लघुवित्तमा समस्या देखिएको चाहिँ होइन ।’

उनीसँग गरिएको कुराकानीको बाँकी अंश भिडियोमा हेर्नुहोस्ः