काठमाडौं । व्यवसायी दुर्गा प्रसाईंले नेपालको बैंक र लघुवित्त वित्तीय संस्थाहरु ठुला व्यपारी र नेताहरुले कब्जा गरेको आरोप लगाएका छन् । मंगलबार काठमाडौंको भृकुटीमण्डपमा चर्को ब्याज र मिटरब्याज पीडितको विषयमा धारणा राख्दै प्रसाईंले यस्तो बताएका हुन् ।
ठूला व्यापारी र नेताहरुले बैंक र वित्तीय संस्थामा कब्जा जमाउँदा सर्वसाधारण नागरिक र साना व्यापारी मर्कामा परेको प्रसाईंको आरोप छ । ‘यो देशका ५५ जना व्यपारी र १० जना नेताहरु मिलेर बैंकलाई कब्जा गरेका छन् । लघुवित्त, सहकारी, माईक्रोफाइनन्स, फाइनन्स कम्पनी, डेभलपमेन्ट बैंक, इन्स्योरेन्स कम्पनी लगायतका कम्पनी ५५ जना व्यपारी र १० जना नेताको हातमा छ ।’, प्रसाईंले भने, ‘लघुवित्त, सहकारी, बैंक र इन्स्योरेन्स भनेको राज्यको हुनुपर्छ । तर, यहाँ व्यापारी र नेताको हुँदा हामी नागरिक र साना व्यापारी मर्कामा पर्यौं ।’
त्यस्तै, उनले चर्को ब्याजदरका कारण व्यावसायी तथा आम नागरिकले दुःख पाएको भन्दै बैंक तथा वित्तीय संस्था नेपाली जनताको लागि शत्रुजस्तो भएको टिप्पणी गरेका छन् ।
‘अहिले मुलुकमा बैंक, लघुवित्त र सहकारीहरु व्यपारीहरुको लागि शत्रुजस्तै भएका छन् ।’, उनले थपे, ‘बैंकको चर्को ब्याजदरले गर्दा सबै अन्यायमा परेका छन् । सोरुममा राखेर बेच्नुपर्ने जुक्ता आज मेलामा राख्नुपर्ने अवस्था आयो, यो भन्दा दुःखको कुरा अरु के हुन सक्छ ?’ त्यस्तै, प्रसाईंले सरकारले जबसम्म ५ प्रतिशत ब्यजादरमा लगानी गर्न सक्दैन, तबसम्म उद्योगधन्दा, कलकारखानाहरु र व्यवसाय नफस्टाउने दाबी गरेका छन् ।
