- भुमिदत्त तिवारी/अर्थ सरोकार सुदूरपश्चिम ब्युरो
कैलाली । कैलालीमा सशस्त्र प्रहरीले अवैध रुपमा नेपाल भित्र्याइँदै गरेका सात लाख बढीको अवैध सामान बरामद गरेको छ । जिल्लाको धनगढी उपमहानगरपालिका १८ डिपो बजारक्षेत्रबाट खुला सिमानाका भएर ल्याइँदै गरको अवस्थामा सात लाख बढीको कपडा र पेट्रोल अटो नियन्त्रणमा लिइएको हो ।
आइतबार खुला सिमानाका भएर नेपाल ल्याइदै गर्दा सामान बरामद गरिएको सशस्त्र प्रहरी बल नेपाल ३४ नम्बर गणले जानकारी दिएको हो । बिओपी फूलवारीका सशस्त्र प्रहरी निरिक्षक सुरेन्द्र भण्डारीको कमाण्डमा खटिएको टोलीले उक्त सामान नियन्त्रणमा लिएको हो ।
सशस्त्र प्रहरी निरिक्षक भण्डारीको टोलीले दुई लाख २७ हजार ९०० रुपैयाँ बराबरको लताकपडा र पेट्रोल अटोसहित सात लाख २७ हजार ९०० रुपैयाँ मूल्य बराबरको सामान नियन्त्रणमा लिएको बिओपी फुलबारीले जनाएको छ । त्यस्तै, सामानसँगै एक जना व्यक्तिलाई समेत नियन्त्रणमा लिएको सशस्त्र प्रहरीले जनाइएको छ ।
नियन्त्रणमा लिएको सामान र व्यक्तिलाई आवश्यक कार्वाहीका लागि भन्सार कार्यालय त्रिनगरमा बुझाइएको छ ।
