">
काठमाडौं । नेपाल उद्योग वाणिज्य महासङ्घका अध्यक्ष चन्द्रप्रसाद ढकालले शेयर र घरजग्गामा सहजरूपमा ऋण दिँदा हाल समस्या देखिएको बताएका छन् । आइविएन मिडिया रिसर्चले आयोजना गरेको ‘अर्थतन्त्रका आन्तरिक समस्या र समाधानका उपाय’ विषयक अन्तक्रिया कार्यक्रममा बोल्दै उनले यस्तो बताएका हुन् ।
विगतमा बैंक तथा वित्तीय संस्थाहरुको सेयर र घरजग्गामा लगानी गर्न सहज रुपमा ऋण प्रवाह गरेकै कारण हाल समस्या देखिएको ढकालले बताए । ‘हिजोका दिनमा बैंक तथा वित्तीय संस्थाहरुले सेयर र घरजग्गामा सहज रुपमा ऋण दिए । अहिले यीनै क्षेत्रमा ठूलो रकम फसेको छ ।’, उनले भने, ‘विगतमा गरिएको कमजोरीकै परिणाम अहिले हामी भोग्दै छौँ । यसलाई सुधारको बाटोमा लैजानुपर्छ ।’
त्यस्तै, उनले लगानीको वातावरण बनाउन राज्य र निजी क्षेत्रबीच समन्वय गर्नुपर्ने बताएका छन् । पछिल्लो समय मुलुकमा दक्ष जनशक्ति नहुँदा समस्या भएकोले आन्तरिक र बाह्य बजारमा सहजरूपमा काम गर्नसक्ने दक्ष जनशक्ति निर्माण गरिनुपर्नेमा समेत ढकालले जोड दिएका छन् ।
कार्यक्रममा बोल्दै अध्यक्ष ढकालले हाल मुलुकका अर्थतन्त्र बाहिर चलेको हल्लाजस्तो अतालिनुपर्ने अवस्थामा पनि नरहेको दाबी गरेका छन् । ‘नेपालको अर्थतन्त्रमा ‘डिप्रेस’ हुनुपर्ने अवस्था छैन । २५ प्रतिशत रेमिट्यान्स बढेको छ, तरलता बढेको छ, ब्याजदर घट्दो छ, सूचक सकारात्मकतिर जाँदैछ, यहाँभन्दा खराब अवस्था आउँदैन’, उनले भने, ‘बरु अब भएको अवस्थालाई माथि उकास्नेतर्फ ध्यान दिनुपर्छ ।’
