काठमाडौँ । झुर व्यवस्थापन, लगातारका दुर्घटना लगायतका कारण बदनाम बनिरहेको नेपाली हवाई यात्रामा अर्को त्यस्तै नमज्जाको घटना थपिएको छ । अनेक विवादमा बेलाबेला तानिने गरेको सीता एयरले दाङबाट काठमाडौं आउन टिकट काटेका यात्रुलाई नेपालगञ्जमा झारेर अलपत्र पारेको पाइएको छ । नेपाल नागरिक उड्डयन प्राधिकरणले घटनाको पुष्टी गरेको छ ।

घटनाप्रति गम्भीर ध्यानाकर्षण भएको भन्दै प्राधिकरणले छानविन प्रक्रिया अगाडि बढाएको समेत जानकारी दिएको छ । घटनाबारे प्राधिकरणले भनेको छ- ‘सीता एयर प्रालिले १५ चैतमा दाङबाट काठमाडौं आउने यात्रु लिई नेपालगञ्ज गएको र त्यहाँ अलपत्र पारी अन्य सेक्टरमा उडान गर्न गएको विषयमा प्राधिकरणको गम्भीर ध्यानाकर्षण भई सो सम्बन्धमा छानविन प्रक्रिया अगाडि बढाइएको छ ।’