काठमाडौं । प्रतिनिधि सभाका स्वतन्त्र सांसद डा.अमरेश कुमार सिंहले नक्कली शरणार्थी प्रकरणमा तीन दलका शीर्ष नेता समेत संलग्न भएको आरोप लगाएका छन् । आइतबार लालितपुरमा आयोजित अन्तरक्रिया कार्यक्रमलाई सम्बोधन गर्दै उनले यस्तो आरोप लगाएका हुन् ।

नक्कली भुटानी शरणार्थी प्रकरण सतहमा आएसँगै तीन दतलका शीर्ष नेताको भेटघाट बाक्लिनुले यो प्रकरणमा शीर्ष नेताहरुको संलग्नताको पुष्टी गर्ने सांसद सिंहको भनाई छ ।

‘यो घटनामा सञ्चारमाध्यम सजग रहनुपर्छ । यसलाई निरन्तर ‘वाच’ गरिएन भने कुरो बिग्रिन्छ ।’, उनले भने, ‘अहिले तीन दलका शीर्ष नेताको बैठक नै यसबाट कसरी निस्किने भन्ने उपायको खोजीमा भइरहेको छ । यदि यो घटनामा शीर्ष नेताहरु जोडिए भने नेपालको राजनीतिका लागि ‘टर्निङ पोइन्ट’ हुन्छ । देश नयाँ नेतृत्वमा जान्छ ।’

त्यस्तै, सांसद सिंहले यसअघि निजी क्षेत्रको मोबाइल सेवा प्रदायक एनसेलको हेडक्वाटर मलेसियामा तत्कालिन प्रधानमन्त्रीका छोरा नै ७५ करोडको ‘डिल’ गर्न पुगेको दाबी छ । तर, को प्रधानमन्त्रीको छोरा भन्ने उनले खुलाएनन् । उनले नेपालको लोकतन्त्र समेत विदेशिको हातमा रहेको टिप्पणी गरेका छन् ।