×

Live on

रेडियो अर्थ सरोकार

Listen to live radio.

माछापुच्छ्रे बैंकको खाताबाट ९ लाख रुपैयाँ हराएपछि ग्राहक मुर्छा परे, बैंक भन्छ- ‘ह्याकरले चोर्यो होला’

GLOBAL IME BANK

माछापुच्छ्रे बैंकको खाताबाट ९ लाख रुपैयाँ हराएपछि ग्राहक मुर्छा परे, बैंक भन्छ- ‘ह्याकरले चोर्यो होला’

८ जेष्ठ २०८०, सोमबार

पढ्न लाग्ने समय: ३ मिनेटभन्दा कम

काठमाडौँ । पछिल्लो समय बैंकबाट पैसा हराएको घटना एकपछी अर्को हुँदै सार्वजनिक भईरहेका बेला माछापुच्छ्रे बैंकबाट पनि ग्राहकको गायब भएको पाइएको छ । बैंकको रौतहटस्थित चन्द्रपुर शाखाबाट बृन्दावन नगरपालिका ३ का रामेश्वरराय यादवको ९ लाख रुपैयाँ हराएपछि आक्रोशित स्थानीयले बैंक नै घेर्न पुगेपछि यो घटना सतहमा आएको हो । आफुले दु:ख गरेर कमाएको पैसा बैंकबाट नै हराएपछि उनी मुर्छासमेत परेका थिए ।

भएको के हो ?
आइतबार यादव चेक साट्न भन्दै रौतहतको चन्द्रपुर शाखामा पुगे । खातामा प्रयाप्त रकम रहेको एकिन भएका उनी ८ लाख रुपैयाँको चेक साट्न भन्दै बैंक गएका थिए । तर, जब उनले बैंकको ट्रेलरमा चेक दिए तब उनको खातामा पैसा नै थिएन । आफ्नो खातामा भएको लाखौँ रकम खाताबाटै गायब भएको थाहा पाएपछि यादब मुर्छित भए । ‘मेरो खातामा कति पैसा थियो भन्ने थाहा पाएरै मैले ८ लाखको चेक साट्न बैंक गएको हुँ । शुक्रबार त मेरो खातामा रकम जम्मा भएको म्यासेज नै आएको छ ।’, यादवले भने, ‘तर, आइतबार बैंक पुग्दा खातामा पैसा नै देखिएन । मैले निकालेको पनि छैन र कतै ट्रान्सफर पनि गरेको छैन । अनि बैंकबाटै मेरो पैसा कसरी चोरी भयो ?’

पीडित यादवका अनुसार शुक्रबारसम्म उनको खातामा १२ लाख २० हजार रुपैयाँ थियो । बिहीबार बिहान उनले १२ लाख २० हजार रकम भएको नेपाल बैंक लिमिटेडको चेक नम्बर ०१२७६४९९७३ को ९ लाख, सोही बैंकको चेक नम्बर ०१२७६४९९७४ बाट २ लाख २० हजार र ग्लोबल आईएमई बैंकको ००५८०१६७५२ नम्बर चेकको १ लाखको भौचर भरेर माछापुच्छ्रे बैंकमा जम्मा गर्न (क्लिरियन्समा) दिएका थिए ।

शुक्रबारमात्रै आफ्नो खाता नम्बर ७५००६५३८२८०००१४ मा पैसा जम्मा भएको म्यासेज पनि आएको यादवले दाबी गरेका छन् । उनका अनुसार आइतबार ८ लाखको चेक लिएर साट्न बैंक पुग्दा बैंकका कर्मचारीले खाताबाट ९ लाख रुपैयाँ गायब भएको जानकारी दिएका थिए । शुक्रबारसम्म खातामै रहेको पैसा रहस्यमय तरिकाले हराएपछि आइतबार पीडित पक्षले बैंकको रौतहटस्थित चन्द्रपुर शाखा घेराउ गरेका थिए । आइतबार बिहान रकम हराएको थाहा पाउने बित्तीकै बैंक घेराउ गर्न पुगेका उनीहरुले साँझसम्म नै बैंक घेराउ गरेका हुन् । पीडित पक्षले बैंकबाटै हराएको रकम फिर्ताको माग गरेका छन् ।

बैंक भन्छ- ‘मोबाइल बैंकिङबाट रकम ट्रान्सफर गरिएको छ’
यता बैंकको चन्द्रपुर शाखाका शाखा प्रबन्धक रामजी दासले भने ग्राहकले नै रकम ट्रान्सफर गरेको दाबी गरेका छन् । बैंकमा रहेको यादबको खाताबाट ९ लाख रुपैयाँ झिकिएको स्वीकार गर्दै उनले उक्त रकम मोबाइल बैंकिङबाट ट्रान्सफर भएको बताएका छन् । ‘यो रकम मोबाइल बैंकिङबाट ट्रान्सफर भएको हो । उहाँले मोबाइल बैंकिङ चलाउनुभएको छ । मोबाइल बैंकिङबाटै रकम ट्रान्सफर भएको देखिन्छ ।’, अर्थ सरोकारसँग कुराकानी गर्दै ब्रान्च मेनेजर दासले भने, ‘अब आरोप त जसले जे लगाउँदा पनि हुन्छ तर सत्य कुरा प्रमाणले देखाउँछ । थप विषयमा छानबिन हुँदैछ ।’

यसो त शाखा प्रबन्धक दासले यसअघि यादबको खाताबाट रकम ‘ह्याकर’ले  चोरी गरेको बताएका थिए । ‘ह्याकरले यादवको खाताबाट पैसा तानेको छ’, ‘दासले भने, ‘यसमा हामी केही गर्न सक्दैनौं ।’

तर, खाताबाट रकम गायब भएको थाहा पाएपछि पनि मेनेजर दास आफ्नो जिम्मेवारीबाट पन्छिन खोजेको यादवको आरोप छ । ‘बैंक सुरक्षित हुन्छ भनेर पैसा खातामा राखेको हो । तर, बैंक खाताबाटै रकम चोरी भएको छ ।’, पीडित यादवले भने, ‘तर, बैंकभने हराएको पैसा आफै पत्ता लगाउनुस् भन्छ । हामीले कसरी पत्ता लगाउने ?’

प्रशासन भन्छ- ‘छानविन हुँदैछ, ग्राहकको रकम फिर्ता हुनुपर्छ’
माछापुच्छ्रे बैंकको उक्त शाखाबाट रकम हराउनु रहस्यमय भएको जिल्ला प्रशासन कार्यालय रौतहटका प्रमुख जिल्ला अधिकारी (सिडिओ) धमेन्द्र कुमार मिश्रले बताएका छन् । बैंक खाताबाटै रहस्यमय रुपमा ग्राहकको रकम गायब हुनु निकै संवेदनशील विषय भएको बताउँदै उनले उक्त घटनामाथि छानबिन सुरु गरेको बताए । ‘माछापुच्छ्रे बैंकको चन्द्रपुर शाखाबाट ग्राहक जानकारी बिना खातामा रहेको ९ लाख रुपैयाँ हराएको हो । आइतबार आक्रोशित बनेका पीडितले बैंक घेराउ पनि गरेका थिए ।’, सिडिओ मिश्रले अर्थ सरोकारसँग भने, ‘यसरी कसैको खाताबाट अनाधिकृत रुपमा रकम हराउनु गलत हो । पीडितले आफ्नो रकम फिर्ता पाउनुपर्छ ।’

त्यस्तै, सिडिओ मिश्रले उक्त प्रकरण सतहमा आएपछि बैंकको हेडअफिसबाट पनि टोली आउन लागेको जानकारी दिए । ‘बैंकको टोली आउँदैछ । प्रहरीले पनि अनुसन्धान गरिरहेको छ ।’, उनले भने, ‘यदी यो केसमा बैंकका कर्मचारीको मिलेमतो देखियो भने कार्वाही हुन्छ ।’

Hamro Parto AD
NMB BANK
TRITON COLLEGE

प्रतिक्रिया दिनुहोस्

सिफारिस: