काठमाडौं । खराब कर्जामा अस्वभाविक वृद्धि भएपछि निर्धन उत्थान लघुवित्त वित्तीय संस्थाको नाफा ह्वात्तै घटेको छ । चालु आर्थिक वर्षको तेस्रो त्रैमाससम्ममा लघुवित्तको खुद नाफा ९४.५२ प्रतिशतले घटेको छ ।

गत आर्थिक वर्षको सोही अवधिमा ८० करोड २६ लाख रुपैयाँ खुद नाफा आर्जन गरेको निर्धन उत्थान लघुवित्तले चालु आर्थिक वर्षमा भने ४ करोड ४० लाख रुपैयाँ मात्रै खुद नाफा आर्जन गरेको हो ।

समिक्षा अवधिमा लघुवित्तको इम्पेयरमेन्ट चार्जमा पनि अस्वभाविक वृद्धि देखिएको छ । यसअवधिमा लघुवित्तको खुद ब्याज आम्दानी र सञ्चालन नाफा पनि क्रमशः १०.१९ प्रतिशत र ९४.३७ प्रतिशतले घटेको छ ।

चालु आर्थिक वर्षको तेस्रो त्रैमाससम्ममा लघुवित्तको खराब कर्जा अस्वभाविक रुपमा बढेर १२.०९ प्रतिशत पुगेको छ । गतवर्ष लघुवित्तको खराब कर्जा ३.३३ प्रतिशत मात्रै रहेको थियो । प्रमुख सूचकहरुमा भारी गिरावट आएसँगै लघुवित्तको प्रतिसेयर आम्दानी (ईपीएस) पनि ४६ रुपैयाँ ६१ पैसाले घटेर २ रुपैयाँ २५ पैसामा सीमित भएको छ । हाल उक्त लघुवित्तको प्रतिसेयर नेटवर्थ १७३ रुपैयाँ ७६ पैसा रहेको छ ।